Умумий давлат чегарасини делимитация ва демаркация қилиш бўйича Тожикистон ва Қирғизистон ҳукумат делегацияларининг топографик ишчи гуруҳлари 28,37 километрлик баҳсли ҳудудларни тавсифлади. Бу ҳақда Тожикистон Миллий хавфсизлик давлат қўмитасининг “Ховар” ахборот агентлиги сайтида хабар берилди.
Хабарга кўра, вакиллар учрашуви 2024 йилнинг 24—29 март кунлари Қирғизистоннинг Боткен вилоятида бўлиб ўтган ва якунларга кўра тегишли баённома имзоланган. Қайд этилишича, томонлар Қирғизистон ҳудудида бўлиб ўтадиган навбатдаги учрашувда қолган ҳудудларни тавсифлаш бўйича ишларни давом эттиришга келишиб олган.
Бир кун аввал Тожикистон ва Қирғизистон ҳукумати делегациялари раҳбарлари – Тожикистон ва Қирғизистон Миллий хавфсизлик давлат қўмитаси раислари Саймўмин Ятимов ва Қамчибек Ташиевнинг чегарани делимитация ва демаркация қилиш бўйича учрашуви бўлиб ўтган эди. Томонлар “қолган участкаларда икки давлат чегара чизиғи йўналишини янада аниқлашда муҳим натижаларга эришганликлари” айтилган. Шунингдек, икки мамлакат ҳукумат делегациялари ишчи гуруҳларига бу борадаги ишларни давом эттириш бўйича топшириқлар берилган.
2024 йил февралида Тожикистон ташқи ишлар вазири Сирожиддин Мухриддин тожик-қирғиз чегарасининг деярли 200 км умумий чизиғи тасвирлангани, 100 километрга яқин баҳсли ҳудудлар қолганлигини маълум қилганди. Бошқарма раҳбари Тожикистон ва Қирғизистон президентлари келишувига кўра, умумий чегара чизиғини делимитация ва демаркация қилиш жараёни тезроқ якунланишидан манфаатдор эканини, бироқ якуний келишув имзоланишининг аниқ санаси ҳозирча номаълумлигини таъкидлаган.
Тожикистон ва Қирғизистон ўртасидаги муносабатлар аввалроқ давлатлар 980 километрдан ортиқ чегарани делимитация қилиш жараёнини якунламагани сабабли бир неча бор ёмонлашган. Бу борадаги музокаралар 2002 йилдан бери давом этмоқда. Чегаранинг баҳсли участкаларида вақти-вақти билан низолар келиб чиқади. Бундай низоларнинг энг йирикларидан бири 2022 йил сентябрда, томонлар қурол ишлатган пайтда юз берган. 2023—2024 йилларда чегараларни делимитация ва демаркация қилиш бўйича ҳукумат комиссиялари томонидан чегара масаласини ҳал этиш бўйича мунтазам йиғилишлар ўтказилмоқда.
Изоҳ (0)