Бразилия президенти Луис Инасиу Лула да Силва Владимир Путиннинг Санкт-Петербургга ташриф буюриш таклифини рад этди. Бу ҳақда у 26 май куни Россия президенти билан телефон орқали суҳбатдан сўнг маълум қилди.
“Мен (Путин) Санкт-Петербургдаги Халқаро иқтисодий форумга таклиф қилгани учун миннатдорлик билдирдим ва ҳозир Россияга бора олмайман, деб жавоб бердим”, — деб ёзди у Twitter’даги микроблогида.
Шу билан бирга, Лула Россия ва Украина ўртасидаги тинчлик музокараларида иштирок этишга тайёрлигини тасдиқлаб, Бразилия “Ҳиндистон, Индонезия ва Хитой билан бирга тинчликка эришиш йўлида можаронинг ҳар икки томони билан гаплашишга тайёр”лигини айтди. Хитой сингари Бразилия ҳам ўзини “нейтрал” давлат ва урушаётган томонлар ўртасида “воситачи” сифатида кўрсатишга ҳаракат қилмоқда.
Аввалроқ Лула Киевга қурол-яроғ етказилишига қарши чиқиб, Ғарб давлатларини “урушни чўзаётган ва рағбатлантираётганликда” айблаган эди. Ушбу баёнотлар қаттиқ танқид қилинди, шундан сўнг Бразилия президенти биринчи марта Россиянинг Украинага бостириб киришини қоралади, аммо Киев ва Москва ўртасида тинчлик музокаралари зарурлигини таъкидлашда давом этди.
22 май куни Лула да Силва ва Украина президенти Владимир Зеленскийнинг Хиросимадаги Еттилик гуруҳи (G7) саммити доирасидаги учрашуви барбод бўлди. Шу муносабат билан Бразилия президенти Зеленский билан учрашишда маъно кўрмаётганини айтди, чунки на Москва, на Киев “тинчлик ҳақида гаплашмоқчи эмас”.
Изоҳ (0)