“Дарё” нашри 24 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Украинага қурол етказиш кечикса, Россия жанг майдонида устунликка эга бўлади
Давом этаётган уруш фонида Украинага қурол-яроғ етказиб бериш янада кечикса, Россия жанг майдонида устунликка эга бўлади.
Washington пост хабарига кўра, ҳозирда Украина армиясининг ҳаракатланиши ҳарбий техника етказиб беришдаги муаммо сабабли секинлашган.
Нашр таҳлил қилмоқдаки, “Кремлнинг Хитой ва Эрон билан иттифоқчилик алоқаларини мустаҳкамлашдан хавотирланиб, Пентагон Abrams танкларини Украинага етказиб беришни тезлаштирмоқчи. Польша ва Словакия эса Украинани қирувчи самолётлар билан таъминлашга қарор қилган.
Хабарда Abrams танклари Украина қўшинларининг баҳорги қарши ҳужумидан тахминан олти ой ўтгач, етказиб берилиши айтилган.
Ҳиндистон ва Россия ҳарбий қурол яроғ етказишдаги ҳамкорлик тўхтатиладими?
Россия қурол экспорти бўйича дунёда иккинчи ўринда турса-да, Украинадаги кенг кўламли уруш йилида рус ҳарбийларининг ўзлари жиддий қурол тақчиллигига дуч келишди.
Айни пайтда Ҳиндистон ҳарбий-ҳаво кучлари вакили Россия Украинадаги уруш туфайли қурол-яроғ бўйича ўз мажбуриятларини бажара олмаслигини маълум қилди.
Ҳиндистон 2018 йилда Россиядан 5,4 миллиард долларга С-400 Триумф ҳаво мудофаа тизимини сотиб олган. Reuters хабарига кўра, ушбу тизимлардан учтаси аллақачон етказиб берилган, яна иккитаси кутилмоқда.
“Бу йил катта етказиб бериш режалаштирилган эди, бу амалга ошмайди. Руслар бизга буни тақдим эта олмаслигини ёзма равишда айтишди”, — дейди вакил.
Эслатиб ўтамиз, бу ҳамкорлик Ҳиндистон ҳарбий-ҳаво кучлари Россия самолётлари учун эҳтиёт қисмлар етказиб беришига боғлиқ.
Хитой раиси Москвага ташрифдан сўнг Киевни куттирмоқда
Хитой раҳбари Россияга ташрифидан кейин Зеленский билан гаплашишни режалаштираётгани маълум қилинганди. 22 март куни Москвага уч кунлик ташриф якунланган бўлса-да, бироқ Киев суҳбат ўтказилиши ҳақида Пекиндан ҳалигача тасдиқ олмади
Хитой Россия ва Украина ўртасидаги келишув масаласини ўз зиммасига олмоқчими ёки эҳтиёткорлик билан четга чиқадими? Тушунишимча, Хитой ҳали буни ўзи учун ҳал қилмаган”, — дейди Украина президент офиси раҳбарининг маслаҳатчиси Михаил Подоляк.
Айни вазиятда АҚШ расмийлари, “Хитой ва Си Цзиньпиннинг ўзи фақат Россия нуқтаи назарини эмас, балки бевосита Украина нуқтаи назарини эшитиши керак”, — деб таъкидламоқда.
Ўзбекистонда 6 баллдан 9 баллгача белгиланган зилзила қачон содир бўлади?
Ижтимоий тармоқларда Ўзбекистон ҳудудларида 6 баллдан 9 баллгача зилзила кузатилиши мумкин бўлган 359 шаҳар рўйхати билан боғлиқ хабарлар тарқалмоқда. Мазкур рўйхат ФВВ сайтига жойлаштирилган.
Тарқалаётган хабарлар икки хил мазмунда чоп этилмоқда. Яъни биринчиси, яқин кунларда шу балдаги зилзила содир бўлиши ҳақида бўлса, иккинчиси бунинг акси.
Гидрометеорологик илмий таҳлиллар канали муаллифи Экин Абдулаҳатовнинг ёзишича, бу рўйхат Ўзбекистоннинг сейсмик раёнлаштириш харитасидан келиб чиқиб тузилган ва қачонлардир ҳудудларда шу кучдаги зилзила бўлиши мумкинлигини англатади.
Баъзи ҳудудлар 9 баллик сейсмик фаол ҳудудларга яқин жойлашган бўлишига қарамай, чуқур илмий ўрганишлар асосида 6 баллик ҳудуд қаторига киритилган”, — дейди мутахассис.
Айни вазиятда Экин Абдулаҳатов аҳолидан хабарларни ваҳима ва саросима билан қабул қилмасликларини сўради.
Изоҳ (0)