Эрон Россия, Қатар ва Туркманистон иштирокида газ хаби яратишни режалаштирмоқда. Бу ҳақда Ислом республикаси нефть вазири Жавад Оужига таяниб, Sputnik хабар берди.

Маълум қилинишича, газ хаби Форс кўрфазининг шимолий қирғоғидаги Бушир вилоятида жойлашган Ассалуе саноат ҳудудида қурилади.

“Биз газ захиралари бўйича дунёда иккинчи ўринда турамиз, шунинг учун Россия, Қатар ва Туркманистон билан ҳамкорликда Ассалуеда хаб яратишни режалаштирмоқдамиз”, — деди вазир.

Жавад Оужи лойиҳа қачон амалга оширилиши ҳақида маълумотлар бермади.

Россия ва Эрон муносабатлари

Москва ва Теҳрон ўртасидаги муносабатлар мустаҳкамланишда давом этмоқда. Мамлакатлар ўртасидаги ҳамкорлик Ғарб давлатлари ва санкцияларни четлаб ўтиб, тўғридан тўғри энергия, озиқ-овқат, қурол-яроғ савдосига қаратилган.

Бундан ташқари, Эрон ва Россия глобал савдо йўлида Сувайш каналига рақобат бўлувчи темирйўл қуради. Рашт-Астара темирйўли Ҳиндистон, Эрон, Россия, Озарбайжон ва бошқа мамлакатларни темирйўл ва денгиз орқали боғлайдиган коридорнинг муҳим бўғини сифатида қаралмоқда.