Жаҳон шахмат федерацияси ноябрь ойи якунлангач, ўз рейтингини янгилади. Ушбу янгиланган жаҳон рейтингида кучли 100 ликдан 5 нафар ўзбекистонлик гроссмейстер ўрин олди.
Рейтингда Нодирбек Абдусатторов (2777) 6-ўринда қайд этилди. У аввалги ойда ҳам шу ўринда қайд этилган эди. Бу ойда унинг рейтинг очколарида ҳам ўзгариш сезилмади.
Бундан ташқари, энг кучли шахматчилар рейтингида Рустам Қосимжонов (2685) ҳам ўрин олган. Тажрибали шахматчи 43-ўринда жойлашган. Жавоҳир Синдоров (2682) аввалги ойдаги каби 46-ўринга жойлашди. 2681 рейтинг очкосига эга шахматчи Шамсиддин Воҳидов 47-ўринга кўтарилди. У октябрь ойидаги рейтингда 48-ўринда эди. Аввалги ойда 62-ўринда қайд этилган Нодирбек Якуббоев (2668) бу ойда 60-ўринда қайд этилди. Ушбу ойда ҳеч қайси ўзбек шахматчилари ўз ҳисобига рейтинг очколари қўшиб қўя олмади: рейтингдаги кўтарилиш бошқа спортчиларнинг йўқотишлар ҳисобига амалга ошди.
Сентябрь ойида Нодирбек ёшлар ўртасидаги расмий рейтингда биринчи ўринда қайд этилган эди. Октябрь ойи учун эълон қилинган рейтингда у ўрнини Ҳиндистонлик Гукешга бўшатиб берди ва ҳануз ўша ўринда жойлашган. Гукеш 2783 рейтинг очкоси билан ёшлар ўртасида етакчилик қилмоқда. Яна бир шахматчи Жавоҳир Синдоров 5-ўринни эгаллаб турибди.
Абдусатторов Ҳиндистоннинг Калкутта шаҳри мезбонлик қилган Tata Steel Chess India турнирида қатнашди. Рапид йўналишида 4-ўринни эгаллаган Ўзбекистоннинг 1-рақамли шахматчиси блитзда 7-ўринни эгаллади.
Тошкентда ўтказилган Президент Кубогида Ўзбекистоннинг топ шахматчилари қатнашди. Бош соврин Ҳиндистон вакилига насиб қилган турнирда иккинчи ўринни Жавоҳир Синдоровга насиб қилди. Шамсиддин Воҳидов мусобақанинг 4-ўрнини эгаллаган бўлса, Нодирбек Абдусатторов кучли бешликдан ўрин олди.
Изоҳ (0)