Стокгольмда тиббиёт ва физиология бўйича Нобель мукофоти лауреатлари эълон қилинди.
2024 йилги мукофот микроРНК молекулаларини кашф этгани ҳамда унинг транскрипсиядан кейинги ген бошқарувида тутган ўрни учун Виктор Амброс ва Гарий Рувкунга берилган.
МикроРНК – рибонуклеин кислотаси (РНК)нинг қисқа молекулаларидан иборат алоҳида синф бўлиб, у бошқа молекулалар қатори кўплаб генларнинг фаоллигини белгилайди. Кўп ҳолларда айнан микроРНКга қараб, организмнинг у ёки бу ҳужайраларида маълум бир ген фаол бўлиши ёки бўлмаслиги аниқланади.
МикроРНКларнинг кашф этилиши жуда муҳим, чунки улар генларни бошқаришда иштирок этади. Бу жараённинг бузилиши оқибатида қандли диабет, онкологик ва аутоиммун касалликлар келиб чиқиши мумкин. Айнан шу сабабли, ген бошқаруви механизмини тушуниш сўнгги ўн йилликларда фан учун муҳим мақсад бўлиб келмоқда.
Тиббиёт ва физиология бўйича мукофот анъанавий тарзда Нобель ҳафталигини очиб беради. 8 октябрь куни физика бўйича, 9 октябрда кимё, 10 октябрда адабиёт, 11 октябрь куни Ослода тинчлик бўйича Нобель мукофоти лауреатлари номи эълон қилинади. Шунингдек, 14 октябрда Швеция банки томонидан 1968 йилда таъсис этилган Альфред Нобель мукофотининг иқтисод бўйича совриндори маълум бўлади.
Тиббиёт бўйича 2023 йилги Нобель мукофоти венгриялик Каталин Карико ва америкалик Дрю Вайсманга топширилганди. Мукофот “COVID-19 га қарши самарали мРНК вакциналарини ишлаб чиқишга имкон берган нуклеозид базаси модификациялари ҳақидаги кашфиётлар учун” берилганди.
Изоҳ (0)