Хитой пойтахти Пекинда коронавируснинг янги ўчоғи пайдо бўлгани учун шаҳарда касаллик авж олиши мумкинлигидан огоҳлантирилди. «РБК»нинг ёзишича, бу ҳақда Хитой Давлат кенгаши бош вазирининг ўринбосари Сунь Чуньлань маълум қилди.
Унинг айтишича, Пекиндаги янги касаллик ҳолатларининг барчаси «Синьфади» энг йирик улгуржи бозори билан боғлиқ. Инфекция тарқалиши хавфи катта эканлигидан огоҳлантирган Сунь Чуньлань қатъий чоралар кўришни талаб қилган.
Бундан ташқари, сиёсатчи бозорда ва унинг атрофидаги ҳудудларда қатъий эпидемиологик текширув ўтказишга, шунингдек, инфекция манбасини аниқлашга чақирди.
South China Morning Post’нинг Пекин соғлиқни сақлаш комиссиясига таяниб хабар беришича, сўнгги суткада Пекин аҳолисининг 76 499 нафари коронавирусни аниқлаш бўйича тестдан ўтган. Уларнинг 59 нафарида тест натижалари ижобий чиққан.
Ушбу ҳолатларнинг бир қисми расмий статистикага киритилган, айримларининг таҳлил натижалари тасдиқланиши кутилмоқда. Умумий ҳисобда эса расмий маълумотларга кўра, Пекинда коронавирусга чалинганлар сони 79 кишига етди.
Аввалроқ Хитой касалликлар назорати ва профилактикаси маркази катта эпидемиологи Пекиннинг COVID-19 борасида «иккинчи Ухань» бўлиш ёки бўлмаслигига баҳо берганди. Айни вақтда Пекиннинг тўртта ҳудудида эпидемиологик хавф даражаси «қуйи»дан «ўрта»га кўтарилган.
Изоҳ (0)