Эксперт Пекиннинг COVID-19 борасида «иккинчи Ухань» бўлиш ёки бўлмаслигига баҳо берди

Пекин COVID-19 коронавирус инфекцияси тарқалиш кўрсаткичи бўйича «иккинчи Ухань» бўлмайди. Хитой пойтахтида COVID-19 енгил формаси тарқалишининг иккинчи тўлиқини кузатилиши мумкин. Бу ҳақда ХХР Соғлиқни сақлаш масалалари қўмитаси олий экспертлар гуруҳи аъзоси, Хитой касалликлар назорати ва профилактикаси маркази катта эпидемиологи Цзен Гуан маълум қилган, деб ёзмоқда «РИА Новости».

Пекиннинг Фэнтай ҳудудидаги «Синьфади» энг йирик улгуржи бозори вақтинча ёпилган. Бозорнинг ёпилишига эпидемиологик суриштирувдан кейин импорт қилинган лосось балиғи тахтасида коронавирус аниқлангани сабаб бўлган. 13 июнда шаҳар маъмурияти оммавий тест қилиш натижасига кўра, ҳудудда COVID-19 инфекциясининг 46 нафар белгисиз ташувчиси борлиги ва улар бозорда фаолият олиб бориши ойдинлашган. Фэнтай ҳудудида ҳарбий вақт тартиби жорий қилинган.

Шаҳар маъмурияти «Синьфади» бозорида ишлайдиганлар ва 30 майдан буён бозорга келганларни COVID-19 нуклеин кислотаси орқали тест қилиш юзасидан фармойиш чиқарган.

14 июнда шаҳарда бир сутка давомида коронавирус инфекциясига чалиниш бўйича 36 та янги ҳолат аниқлангани маълум бўлди.

«Ҳозирча иккинчи тўлқин содир бўлиши ҳақида концепция мавжуд эмас, бу шунчаки шартли тахмин. Иккинчи тўлқиннинг бўлиш ёки бўлмаслиги биз қиладиган профилактик тадбирларга боғлиқ. Масалан, кейинги бир неч кун давомида касалланганлар сони ўсиши мумкин, бироқ кейин вирус назорат остига олинади ва юқори эмас, аксинча, паст тўлқин кузатилади. Пекин ‘иккинчи Ухань’га айланмайди, вирус бошқа шаҳарларга ўта бошлаганидан кейин ҳудудни ёпишга тўғри келганди», — дея маҳаллий ОАВга интервью берган Цзен Гуан.

Пекиннинг барча аҳолисидан COVID-19’га тест олиш зарурияти ҳақида берилган саволга эксперт ҳозирча бунга зарурат йўқлиги, лекин текширишлар сонини ошириб, дўконлардаги ходимларни, бозор яқинидаги умумий овқатланиш масканларини текшириш кераклигини қайд этди.

Шунингдек, Цзен Гуан вирус ташувчиси номаълумлиги сабаб хом балиқни, хусусан, лососни емаслик, денгиз маҳсулотларини яхшилаб қовуриб ёки қайнатиб истеъмол қилишни тавсия этган.

«Айни вақтда вируснинг манбаси ҳақида маълумотга эга эмасмиз, лососга инфекция одамдан ўтганми ёки балиқ биринчи касалланганми билмаймиз. Аниқ жавоблар олганимиздан кейин балиқни хом ҳолатда ейиш мумкинлиги ҳақида маълумот берилади. Ҳозирча текширув натижаларини кутишга тўғри келади», — деган эксперт.

Эпидемиолог шаҳар аҳолисига шахсий гигиена қоидаларига амал қилиш, қўлларни тез-тез ювиш, одамлар тўпланадиган жойларда тиббий ниқобда юриш ва ваҳимага берилмасликни тавсия қилган.

Айни вақтда Пекиннинг тўртта ҳудудида эпидемиологик хавф даражаси «қуйи»дан «ўрта»га кўтарилган.