Пекин улгуржи бозорида коронавирус аниқлангани сабаб қўшни Хэбэй провинциясининг Баодин шаҳрида ҳарбий ҳолат режими эълон қилинди. Бу ҳақда ҳукумат вакилларига таяниб, NBD хабар берди.
Ҳукумат бу каби қарорни Баодин Пекин яқинида жойлашгани, икки шаҳар орасида юк ташиш ва фуқароларнинг ҳаракати жуда яқин бўлгани сабаб қабул қилган.
Маълумотлар кўра, Баодин шаҳрида 11,5 миллион одам истиқомат қилади. Шаҳар Пекиндан 140 километр узоқликда жойлашган.
Пекиннинг Фэнтай туманида жойлашган «Синьфади» улгуржи бозори 13 июнь куни коронавирус хавфи сабаб ёпилган эди. Таъкидланишича, бозорга келган 517 кишининг 45 нафарида коронавирус аниқланган.
Сўнгги маълумотларга кўра, Хитойда сўнгги суткада коронавирус билан касалланиш бўйича 49 та ва касаллик белгисиз ўтаётган 18 та ҳолат аниқланган. Мамлакатда умумий ҳисобда 83 181 киши коронавирусга чалинган. Беморларнинг 78 370 нафари соғайган, 4 634 нафари вафот этган.
Изоҳ (0)