ЖССТ коронавируснинг дастлаб Ухандаги денгиз маҳсулотлари бозорида пайдо бўлганига аниқ далиллар йўқлигини маълум қилди

Жаҳон соғлиқни сақлаш ташкилоти Хитойнинг Ухань шаҳридаги денгиз маҳсулотлари бозори коронавирус билан касалланишнинг дастлабки манбаси бўлганлигини тасдиқловчи маълумотларга эга эмас. Бу ҳақда ЖССТнинг ҳайвонлардан одамларга ўтадиган инфекциялар ва озиқ-овқат хавфсизлиги бўйича эксперти Питер Бен Эмбарек маълум қилди, деб ёзмоқда «ТАСС».

«Бу бозор вируснинг тарқалишида қандайдир рол ўйнаган — ёки пайдо бўлиш манбаси сифатида ёки унинг тарқалишида. Бироқ биз бозор вируснинг пайдо бўлиш манбаси бўлган ёки йўқлигини аниқ билмаймиз», — дея тушунтириш берган эксперт.

Эмбарек харидорлар ёки сотувчилардан кимдир вирусни бозорга олиб келган бўлиши мумкинлиги, натижада вирус аҳоли орасида тарқалганини истисно қилмаган.

Экспертнинг таъкидлашича, Уханда қайд этилган дастлабки касаллик ҳолатлари оғир шаклда кечган. Бироқ кейинчалик касаллик енгилроқ ўтиши мумкинлиги ҳақида ҳам маълумотлар олинган. «Бу бозорга алоқаси бўлмаган баъзи кишилар қандай қилиб вирус билан касалланганлигини тушунтириши мумкин. Биз вирус тарқалишининг бошида нима бўлганини билмаймиз», — деган эксперт.

Эксперт янги турдаги коронавируснинг манбаси кўршапалаклар бўлиши мумкинлиги ҳақидаги саволга ҳам жавоб берган. Эмбарекнинг айтишича, коронавируснинг бундан олдинги барча турлари кўршапалакларда аниқланган, шунинг учун янги вирус ҳам кўршапалаклардан келиб чиққан деган умумий фикр мавжуд. «Аввалги коронавирусларнинг ҳозирги SARS-CoV-2 вируси билан яқинлиги бўлишига қарамасдан, янги вируснинг келиб чиқишини аниқ билиш учун бу етарли эмас. Барча вируслар бир-бири билан боғланган, бироқ улар орасида масофа мавжуд», — дея таъкидлаган эксперт.

Коронавируснинг Ухандаги биолабораторияда яратилгани ҳақидаги фикрларга муносабат билдирган Эмбарек коронавирус билан ишлайдиган лабораториялар одатда ҳайвонлар билан ишламаслигига эътибор қаратган. Унинг айтишича, коронавирус билан ишлайдиган лабораториялар турли ҳайвонларнинг биоматериал намуналарини олади, кейин коронавируслар аниқланади ва улар ўрганилади. Ҳайвонларни ўрганиш эса махсус лабораторияларда амалга оширилади ва умуман бошқа турдаги лаборатория ҳисобланади.

Аввалроқ Fox News телеканали коронавируснинг Уханда лаборатория шароитида яратилганини тахмин қилганди. Дональд Трамп ҳам коронавирус лабораторияда яратилганини исботловчи далиллари борлигини билдирган. АҚШ давлат котиби Майкл Помпео Хитой касаллик тарқалиши юзасидан муҳим ахборотга эга бўлгани, аммо уни ўз вақтида ошкор қилмаганини айтган.

Бунга жавобан ЖССТ АҚШ коронавирус лабораторияда яратилгани тўғрисида ҳеч қандай маълумот тақдим этмаганини, коронавирус Хитой лабораторияларида пайдо бўлгани тўғрисидаги баёнотни спекулятив деб айтган.

Австралиянинг The Daily Telegraph нашри АҚШ, Буюк Британия, Канада, Австралия ва Янги Зеландия махсус хизматларини бирлаштирувчи «Беш кўз» разведка альянси томонидан тайёрланган 15 варақли ҳисоботга таяниб, Хитой COVID-19 коронавирус инфекциясига оид далилларни қасддан йўқ қилиб юборганини ёзганди.

The Guardian ғарб махсус хизматларида Хитой коронавирус ҳақидаги маълумотларни яширганлигига оид далиллар йўқлигини, Австралия газетадаги маълумотлар «Беш кўз» разведка альянсидан эмас, АҚШнинг ўзидан келганини билдирган.