Хитой коронавирус манбасини аниқлаш учун Ухандаги минглаб қон намуналарини ўрганади

Хитойлик олимлар Ухань шаҳридаги қон банкидан ўн минглаб намуналарни ўрганмоқчи. Бу ҳақда ХХР соғлиқни сақлаш органларига таяниб, CNN хабар берди. COVID-19 биринчи марта Уханда тарқалган деб ҳисобланади.

2020 йилнинг февраль ойида Жаҳон соғлиқни сақлаш ташкилоти тадқиқотчилари гуруҳи янги коронавирусга қарши антитаналар бўлиши мумкин бўлган 200 мингга яқин қон намунасини аниқлаган эди, улар орасида 2019 йилнинг сўнгги ойларида йиғилганлари ҳам бор.

Инфекцияга энг биринчи чалиниш ҳолати расман 2019 йил 8 декабрда қайд этилган, аммо кўплаб олимларнинг фикрича, коронавирус одамлар орасида октябрь—ноябрь ойларида тарқалган.

Намуналар Ухань қон марказида сақланади. Хитой ҳукумати уларни икки йил давомида кўрикдан ўтказиб бўлмаслигини айтган, чунки улар қон топшириш билан боғлиқ суд ишларида далил сифатида керак бўлиши мумкин. 2019 йилнинг кузида олинган намуналарни текширувсиз сақлаш муддати тез орада тугайди. Хитой Миллий соғлиқни сақлаш комиссияси вакилининг айтишича, тадқиқотга тайёргарлик ишлари олиб борилмоқда, намуналарнинг икки йиллик муддати тугагандан кейин текширув бошланади.

Колумбия университетининг эпидемиолог доценти Морин Миллер CNN’га берган интервьюсида, намуналар таркибида муҳим ҳаётий маълумотлар сақланиб қолишини айтди. У Хитойни чет эллик малакали мутахассислар учун тадқиқот жараёнини кузатишга рухсат беришга чақирди. Акс ҳолда Хитой хабар қилган натижаларга ҳеч ким ишонмайди, деди Миллер.

Вандербилт университети тиббиёт мактаби профессори Уильям Шаффнер қон намуналари билан боғлиқ иккита эҳтимолий қийинчилик ҳақида гапирди: уларнинг ҳақиқийлиги ва тегишлилиги. Унинг сўзларига кўра, донорлар одатда соғлом одамлар бўлади, уларда аксарият ҳолларда COVID-19 симптомсиз ўтади. Шаффнер, шунингдек, ЖССТ экспертлари мустақил тадқиқот ўтказиши учун намуналарни Женевага ёки бошқа нейтрал жойга етказиб беришни маъқуллади.

Хитойда COVID-19 га чалиниш бўйича илк ҳолат 2019 йил декабрь ойида расман аниқланган ва касаллик пайдо бўлиши Ухандаги денгиз маҳсулотлари бозори билан боғланган. Март ойи охирида Хитой ва Жаҳон соғлиқни сақлаш ташкилоти томонидан чоп этилган ҳамкорликдаги тадқиқотга кўра, одамларда вақти-вақти билан тарқаладиган инфекциялар Ухандаги коронавирус авж олишидан олдин ҳам бўлган.

Ғарб давлатлари Хитойни коронавируснинг келиб чиқиши бўйича халқаро текширувда ҳамкорлик қилишдан бош тортгани учун танбеҳ бермоқда. Пекин бу айбловларни бир неча бор рад этган.