Коронавирус: пандемия бўйича 14 апрелнинг асосий хабарлари

Жаҳондаги вазият

Жонс Ҳопкинс университети маълумотларига кўра:

• Дунё бўйича инфекция билан касалланганлар — 1 935 646 киши;
• Касалликдан тузалганлар — 464 398 киши;
• Инфекция оқибатида вафот этганлар — 120 914 киши.

АҚШ коронавирус қурбонлари ва касалланганлари сони бўйича дунёда биринчига айланган: шу кунга қадар мамлакатда вирус оқибатида 23 654 та ўлим ҳолати қайд қилинган, 582 634 киши касалланган. Россияда коронавирусга чалинганлар сони 18 328 кишига, вафот этганлар сони эса 170 нафарга етди. Қозоғистонда коронавирус билан касалланганлар сони 1179 кишига, қурбонлар эса 14 кишига етди. Қирғизистонда коронавирус билан касалланганлар сони 430 кишига етди. Таъкидланишича, касалларнинг 11 нафари оғир аҳволда.

Ўзбекистондаги вазият

Ўзбекистонда 14 апрель соат 15:30 ҳолатига кўра, коронавирус инфекциясини юқтириб олган фуқаролар сони 1113 нафарга етди. Ўзбекистонда коронавирус билан касалланганлар сони 13 апрель куни 133 тага кўпайди. Бу янги рекорд. Бундан аввал фақат бир марта — 6 апрелда 115 кишида коронавирус қайд этилганди.

Шу кунгача 99 киши коронавирусдан соғайгани маълум қилинди. Инфекция оқибатида тўрт киши вафот этган.

Чет элдаги камида 23 ўзбекистонлик коронавирусга чалинган, уларнинг уч нафари (барчаси АҚШда) вафот этган. Вафот этганлардан бири Ўзбекистонда хизмат кўрсатган артист, таниқли шашмақом ижрочиси Рустам Самарқандий эди.

Жаҳонда нима гап?

Жаҳон соғлиқни сақлаш ташкилоти (ЖССТ)нинг расмий вакили Маргарит Харрис Женевада бўлиб ўтган брифингда коронавирус тарқалиши билан боғлиқ вазият баъзи мамлакатларда яхшилана бошлагани, бироқ пандемия дунёда ўз чўққисига чиқмаганини маълум қилди. Унинг сўзларига кўра, янги қайд этилаётган ҳолатларнинг 90 фоизи Европа мамлакатлари ва АҚШга тўғри келади.Аввалроқ ЖССТ раҳбари коронавирус туфайли жорий этилган чекловларни олиб ташлаш бўйича тавсиялар берганди. Австрия, Италия ва Испания карантин чекловларини енгиллаштиришни бошлади.

Туркия парламенти коронавирус пандемияси туфайли 90 мингга яқин маҳбусни вақтинча озод қилишга қарор қилди. Қарорга кўра, маҳкумлар 31 майгача озод этилади, сўнг жазо муддатини ўташни давом эттиради. Бу вақтга қадар пандемия чекинмаса, озодликда юриш муддати узайтирилиши мумкин. Оғир жиноятлар, террорчилик ҳаракатлари, аёлларга нисбатан зўравонликда айбдор деб топилган шахслар вақтинча озод қилинишга даъвогарлик қила олмайди. Аввалроқ коронавирус туфайли АҚШда минглаб маҳбуслар озод қилиниши, Бразилиядаги қамоқхонадан 400 га яқин маҳбус қочиб кетгани хабар берилганди.

Австрияда 14 апрелдан бошлаб коронавирус тарқалишининг олдини олиш мақсадида жорий этилган чекловларни аста-секин бекор қилиш бошланади. Бир ойлик карантиндан сўнг майдони 400 метр квадратгача бўлган, шунингдек, барча қурилиш ва боғдорчиликка оид дўконлар қайта иш бошлайди.

Жаҳон соғлиқни сақлаш ташкилоти раҳбари Тедрос Адан Гебрейесус коронавирус туфайли жорий этилган чекловларни олиб ташлаш бўйича тавсиялар берди. Унинг сўзларига кўра, давлатлар чекловларни олиб ташлашдан олдин бир қатор чораларга амал қилинганига ишонч ҳосил қилиши керак. Хусусан, ҳукумат вируснинг одамдан одамга юқишини, касалланиш бўйича вазиятни назорат қила олиши лозим. Соғлиқни сақлаш тизими ҳар бир COVID-19 ҳолатини аниқлаш, текшириш, изоляция қилиш ва даволаш имкониятига эга бўлиши керак.

Тожикистоннинг Бохтар шаҳрида хориждан келган тожикистонликлар карантинда сақланаётган маҳаллий клиник шифохоналардан бирининг ходимаси вафот этди. Мамлакат Соғлиқни сақлаш вазирлиги фуқароларни Тожикистон ҳудудида коронавирус инфекцияси тарқалгани тўғрисидаги миш-мишларга ишонмасликка чақирмоқда.

АҚШ давлат котиби Майкл Помпео Германиянинг Bild нашрига берган интервьюсида келажакда коронавирус пандемиясининг айбдорлари топилиши кераклигини айтиб, Хитой ушбу касаллик ҳақида вақтида хабар бермаганини таъкидлади. «Хитойнинг Ухань шаҳрида бошланган бу вирус, бу эпидемия ҳақида вақтлироқ хабар топмаганимиздан афсусдамиз. Хитой ҳукумати, Хитой Коммунистик партияси бу маълумотларни ўз вақтида тақдим этмади», — деган Майкл Помпео.

Бирлашган Араб Амирликларида ўтган бир сутка ичида 398 кишида коронавирус аниқланди. Бутун мамлакат бўйлаб коронавирусга чалинганлар сони 4521 кишини ташкил этмоқда

Ўзбекистонда нима гап?

Шавкат Мирзиёев 14 апрель, сешанба куни, глобал инқироз ва пандемия шароитида Ўзбекистон қишлоқ хўжалиги олдида турган долзарб вазифалар муҳокамасига бағишланган видеоселектор йиғилиши аввалида коронавирус инфекциясига қарши кураш доирасида мамлакатда амалга оширилаётган ишларга яна бир бор алоҳида тўхталиб ўтди.

Айниқса, ҳокимлар ва сектор раҳбарлари аҳолининг энг муҳим ҳаётий эҳтиёжларини тўлиқ таъминлаш, нарх-навонинг ошиб кетмаслигига эришиш ва кам таъминланган оилаларни қўллаб-қувватлаш борасидаги ишлар самарадорлиги учун шахсан жавоб беради. Айни пайтда кам таъминланган, эҳтиёжманд ва ёрдамга муҳтож оилаларга мурувват ва саховат кўрсатиш, уларнинг ҳолидан хабар олиш, бу каби эзгу ташаббусларни кўпайтириш жойлардаги барча мутасадди раҳбарларнинг асосий вазифаларидан бири бўлмоғи лозим.

Шавкат Мирзиёев, Ўзбекистон Президенти

Транспорт вазирлиги ахборот хизмати раҳбари Наврўз Ашурматов Республикадаги аэропортлар иш фаолияти ва авиапарвозларнинг қайта тикланиши ёки чеклов чораларининг узайтирилиши Республика махсус комиссияси томонидан эълон қилинишини маълум қилди.

Ўзбекистонда коронавирус сабабли пенсия пуллари май ойидан бошлаб пластик карталарда тўланади, валюта алмаштирадиган банкоматлар кўпайтирилади. Пенсионерлар томонидан банк карталарини очиш ва унга эга бўлиш учун Халқ банки бўлимларига бориш талаб этилмайди.

Ўзбекистонда карантин тадбирлари эълон қилинган вақтдан бугунги кунга қадар карантин қоидаларига амал қилмаслик билан боғлиқ жами 59 921 та ҳолат аниқланди. Қайд этилишича, энг кўп — 10 100 та қоидабузарлик Тошкент шаҳрида қайд этилган. Тошкент вилоятида эса бундай ҳолатлар сони 8 588 тани ташкил этмоқда.

Хоразмда ҳарбий қисмдаги карантиндагилар орасида коронавирус тарқалгани ҳақидаги хабарларга аниқлик киритилди. «23—24 март кунлари ушбу ҳарбий қисмдаги карантин пунктида 492 нафар фуқародан COVID-19 короновирус касаллигини аниқлаш мақсадида текшириш учун намуналар олинди. 25—27 март кунлари вирусологик текширувлар натижасига кўра, 7 нафар мусбат натижа қайд қилинди», — дейди Санитария-эпидемиология назорати давлат инспекцияси бошлиғи, Республика бош давлат санитария инспектори Нурмат Отабеков.

Тошкентдаги 17-шаҳар клиник шифохонаси ва 8-оилавий поликлиника карантинга ёпилди. Ушбу хабарни бош давлат санитария инспектори Нурмат Отабеков АОКАда ўтказилган брифинг вақтида тасдиқлаган.

Марғилон шаҳридаги деҳқон бозори ҳудудида ИИБ пост-патруль хизмати ва жамоат тартибини сақлаш бошқармаси ходими калтакланди. Маълум бўлишича, 12 апрель куни соат 15:30 да вилоят ИИБ ППХ ва ЖТСБ ходими бозор ҳудудидаги автотураргоҳга кириш қисмида юзига ниқоб тақмай нон сотаётган 18 ёшли Д.Қ.дан ниқоб тақиб олишни талаб қилган. Бунга жавобан, Бош прокуратура ахборотида таъкидланишича, фуқаро ИИБ ходимининг юз ва оёқ соҳаларига уриб, тан жароҳати етказган. Жараённинг бошқа тафсилотлари маълум қилинмаган.

Ўзбекистонда карантин даврида Президент виртуал қабулхонаси ва Халқ қабулхоналари мурожаатларни кўриб чиқишни давом эттирмоқда.

Бугун бутун дунё COVID-19 касаллиги билан курашиш учун ҳаракат қилмоқда. Пандемия Марказий Осиё халқлари учун қанчалик таниш? Тарих аввал бундай вазиятга дуч келганми? «Дарё» колумнисти Жаҳонгир Остонов XIX—ХХ асрларда Туркистонда юз берган эпидемиялар, хусусан, вабо тарихи ҳақида маълумот беради.