Хитой Халқ Республикаси раиси Си Цзиньпин билан телефон суҳбати чоғида АҚШ президенти Жо Байден, шу жумладан, COVID-19 пандемияси муносабати билан, жамоатчилик саломатлиги ва ушбу соҳадаги шаффофлик мавзусини кўтарди, деб ёзади «РБК» Оқ уй вакили Карин Жан-Пьерга таяниб.
«Биз пандемиянинг келиб чиқишини аниқлаш учун кўпроқ маълумотлар кераклигини айтдик. Биз Хитойни ахборот билан тўлиқ бўлишишга ва Жаҳон соғлиқни сақлаш ташкилоти билан ҳамкорлик қилишга мажбурлаш учун бутун дунё бўйлаб шерикларимиз билан ишлашда давом этяпмиз», — деди матбуот котиби.
Хитой 2019 йилда коронавирус билан касалланганлар аниқланган биринчи мамлакатга айланганди. Турли маълумотларга кўра, биринчи ҳолат ноябрда ёки декабрда Хубэй провинциясида, хусусан, Ухань шаҳрида қайд этилган. ХХРдан вирус бутун дунёга тарқалишни бошлади — 2020 йил қишида илк ҳолатлар, масалан, Россия ва АҚШда аниқланди.
Коронавируснинг келиб чиқиши бўйича турли версиялар илгари сурилди. Дастлаб инфекция ўчоғи Ухандаги ҳайвонлар ва денгиз маҳсулотлари бозори бўлган, деб тахмин этилганди. Аммо кейинроқ хитойлик олимлар буни рад этиб, вирус кўршапалакларда пайдо бўлиб, сўнг воситачи ҳайвон орқали одамга ўтган, деган хулосага келди. ЖССТ бундай назарияни эҳтимолга яқинроқ деб атади.
АҚШ SARS-CoV-2 ҳужайрасиз ҳаёт шакллари ўрганиладиган ва 2002—2003 йилларда бошқа бир коронавирус аниқланган Ухань вирусология институтида пайдо бўлган бўлиши мумкинлигини маълум қилди. Аммо институтдагилар бундай вирусни яратиш имконсиз эканини айтди. АҚШ разведкаси кейинроқ вирус вужудга келишининг эҳтимолий сабаблари сифатида касалланган ҳайвондан юқиш ёки лабораториядан сизиб чиқиши версияларини айтди. ЖССТ институтдан сизиб чиқишини эҳтимолдан узоқ деб атади, аммо вируснинг келиб чиқишини ўрганиш учун ХХРдан барча зарур ҳужжатларни олмаганини маълум қилди.
Пекин, ўз навбатида, мамлакатга вирусни олиб киришда америкалик ҳарбийларни айблади, Вашингтон эса бу даъволарни ёлғон деб атади.
Ҳозирги пайтда Хитойда касалланиш даражаси бошқа баъзи мамлакатларга нисбатан пастроқ: Миллий соғлиқни сақлаш комиссияси маълумотларига кўра, 27 июль куни у ерда 626 кишида вирус аниқланган. Худди шу куни Россияда 11,5 мингта, АҚШда эса 151 мингта ҳолат қайд этилган.
Эслатиб ўтамиз, Хитойнинг Ухань шаҳри ҳукумати тўрт кишида коронавирус аниқланганидан кейин шаҳарнинг қарийб 1 миллион аҳоли яшайдиган бутун бир туманини карантинга ёпди.
Изоҳ (0)