ЖССТ экспертлари: COVID-19 2019 йил декабридан аввалроқ пайдо бўлган бўлиши мумкин

Хитойнинг Ухань шаҳрига юборилган Жаҳон соғлиқни сақлаш ташкилоти (ЖССТ) экспертларининг оралиқ хулосалари гувоҳлик беришича, COVID-19’ни юқтириб олиш ҳолатлари 2019 йил декабридан аввал пайдо бўлган. ЖССТ делегацияси аъзоларининг хулосалари ҳақида The Wall Street Journal хабар берди, деб ёзади «Коммерсантъ».

Экспертлар тахмин қилишича, Ухандаги биринчи касалланиш ҳолати ҳақида маълум бўлишидан икки ой аввал марказий Хитойда 90 га яқин одам коронавирус симптомлари билан касалхонага ётқизилган бўлиши мумкин. ЖССТ экспертлари Хитой ҳукуматидан қўшимча таҳлиллар олиб бориш учун рухсат сўради.

«Яна тадқиқотлар ўтказиш керак», — деди ЖССТ гуруҳи раҳбари Питер Бен Эмбарек. Дастлабки хулосалар бўйича тафсилотларни у маълум қилмади.

Илгари номаълум бўлган вирусга чалиниш бўйича илк ҳолатлар ҳақида расман 2019 йил декабри бошида маълум бўлган эди. Хитойнинг Ухань шаҳридаги озиқ-овқатлар бозори вирус тарқалиш ўчоғига айланган. 2020 йил мартида COVID-19 Хитой ташқарисида тарқалиб кетганидан кейин ЖССТ ҳодисани пандемия деб эътироф этди. 2021 йил 14 январь куни ЖССТ экспертлари делегацияси вирус манбасини қидириш учун Уханга етиб келди. 10 февраль куни уларнинг ташрифи ўз ниҳоясига етди.

Аввалроқ Жаҳон соғлиқни сақлаш ташкилоти (ЖССТ) экспертлари Хитойнинг коронавирус пандемияси бошланган Ухань шаҳрига қилинган сафар ҳақида ҳисобот берган эди. Мутахассислар COVID-19 Уханда 2019 йил декабрида тарқалишни бошлагани ҳақидаги версияни тасдиқлаган, инфекциянинг бундан аввалроқ авж олгани бўйича далиллар шаҳарда ёки унинг ташқарисида топилмагани ҳақида айтган эди.