Қозоғистон “рақамли кўчманчилар” — масофавий иш ва саёҳатни бирлаштирган сайёҳлар учун янги Nео Nomad визасини беришни бошлади. Бу ҳақда республика Туризм вазирлиги матбуот хизмати хабар берди.
Бундай визани олиш учун хорижлик Қозоғистондан ташқарида камида 3 минг доллар даромадга эга бўлиши керак.
Вазирлик баёнотида айтилишича, янги виза режимини жорий қилишда COVID-19 пандемиясидан кейин бундай дастурларни йўлга қўйган 50 та давлат тажрибасидан фойдаланилган. Nео Nomad визаси билан чет эл фуқаролари хорижий компаниялардаги фаолиятини давом эттирган ҳолда Қозоғистонда бир йилгача бўлишлари мумкин.
Nео Nomad талаблари тиббий суғурта ва судланмаганлик тўғрисидаги маълумотномани ўз ичига олади. Қайд этилишича, бундай визанинг жорий этилиши туфайли Туризм вазирлиги ҳар йили 3 миллиард тенге (6,8 миллион доллар) фойда олади.
Қозоғистонда 2023 йил октябрь ойидан бошлаб “рақамли кўчманчи” визасини жорий этиш режалаштирилган эди. Бундай дастур келажакда фуқароликни олиш учун ҳеч қандай асос бўлмаслиги маълум қилинган. Агар чет эл фуқароси яшаш учун рухсатнома олмоқчи бўлса, у буни умумий асосда амалга оширади.
Изоҳ (0)