Коронавирус келиб чиқишини ўрганаётган Жаҳон соғлиқни сақлаш ташкилоти (ЖССТ) мутахассислари Хитойда инфекциянинг 2019 йил декабрь ойидан илгарироқ тарқалганига оид бир қанча белгиларини аниқлади. Бу ҳақда ЖССТ халқаро экспертлари берган интервью маълумотларига таяниб, «РБК» хабар берди.
Гуруҳ раҳбари Питер Бен Эмбарекнинг сўзларига кўра, илк бор декабрь ойида коронавирус инфекцияси кенг тарқалган Ухань шаҳрида ўша пайтда ўндан ортиқ SARS-COV-2 штамми мавжуд бўлгани аниқланди. ЖССТ мутахассислари SARS-COV-2’нинг мутацияси деб тахмин қилинаётган 13 та штаммни аниқлашга муваффақ бўлди, деди Эмбарек. Сидней университети вирусологи, профессор Эдвард Холмснинг таъкидлашича, ушбу штаммлар коронавируснинг Ухань шаҳрида декабрь ойидан илгарироқ тарқалганидан далолат бериши мумкин.
Бундан ташқари ЖССТ экспертлар гуруҳи аъзоси доктор Питер Дассак коронавирус жанубий Хитой ва Жануби-шарқий Осиёдаги кўршапалаклардан тарқалган бўлиши мумкинлигини айтди. Унинг сўзларига кўра, кўршапалаклар орқали инфекция ёввойи ҳайвонлар боқиладиган фермага етиб борган ва фермадаги мушуксимон синет, сассиқкўзан, бўрсиқ, енотсимон итларга юққан бўлиши мумкин. «Эҳтимол, ферма ишчилари вирусни юқтириб, уни бозорга олиб келган ёки вирус юқтирган ҳайвонларни бозорга олиб чиққан. Коронавирус Хуаньань ёки Ухань бозорида пайдо бўлганидан кейин янада кенг тарқалган » — қўшимча қилди ЖССТ эксперти.
ЖССТ мутахассислари аввал ҳам Хитойда инфекция 2019 йил декабридан илгарироқ тарқалгани ҳақидаги тахминларни истисно қилмаган. Хабарга кўра, Хитой Ухань шаҳрида SARS-COV-2 аниқланганини расман эълон қилишидан икки ой олдин, мамлакатнинг марказий қисмида шу каби аломатлар билан қарийб 90 киши касалхонага ётқизилган. Уларда инфекция излари топилмаган, аммо мутахассислар уларни вирусга чалинган бўлиши мумкинлигини инкор этмаяпти.
ХХР ҳукумати коронавирус инфекциясига чалиниш бўйича дастлабки ҳолатларни 2019 йил декабрь ойининг бошида расман эълон қилганди. Касаллик биринчи бўлиб Хубэй вилоятининг маркази Ухань шаҳрида аниқланган. Ҳукумат берган маълумотга кўра, денгиз маҳсулотлари бозори вирус тарқалишининг манбаси бўлган.
Аввалроқ ЖССТ мутахассислари Хитой ҳукуматининг 2019 йил декабрь ойида Ухань шаҳрида қайд этилган коронавирус бўйича дастлабки 174 та ҳолат тўғрисида маълумот олиш учун юборилган сўровларни рад этгани ҳақида маълум қилган. Бу ЖССТ мутахассисларига вируснинг қачон ва қандай тарқалишига оид дастлабки босқичлар ҳақида ўз таҳлилларини ўтказишга имкон бермаган.
Изоҳ (0)