“Барча даврларнинг энг яхши анимацион фильми”: Ўз даврида чет давлатларда ҳам хитга айланган совет мультфильмлари (фото)

Қадрдон совет мультфильмлари нафақат посцовет ҳудудида севиб томоша қилинади, балки Ғарб томошабинларини ҳам ўзига мухлис қилган. Улар энг оддий томошабинларни ҳам, нуфузли фестивалларнинг ҳакамлар ҳайъатини ҳам ҳайратда қолдира олган.

“Тумандаги кирпи”, 1975 йил

Тахминан 10 дақиқа давом этадиган бу қисқа мультфильмни бутун дунё тан олади. 2003 йилда Токиодаги Лапута халқаро анимация фестивалида барча даврларнинг энг яхши мультфильми деб топилади. Шунингдек, 1977 йилда Лондон халқаро кинофестивалида “Йил фильми” номинациясида ғолиб чиқади.

“Букри тойчоқ”, 1947 йил

Пётр Ершов эртаги асосида яратилган ва фолклор билан тўлдирилган ушбу мультфильм хориждаги энг машҳур совет анимацион фильмларидан бирига айланди. Чет элликлар ҳаттоки асар муаллифи режиссёр Иван Иванов-Ванони маҳорати ва деталларга синчковлик билан эътибор бергани учун Уолт Диснейга қиёслашади.

Чебурашка ҳақида мультфильмлар серияси, 1969–1983

Пахмоқ мўйнали ёқимтой жонивор ҳақидаги мультфильм Эдуард Успенскийнинг “Тимсоҳ Гена ва унинг дўстлари” китоби асосида яратилган. Роман Качанов режиссёрлигидаги мазкур мультфильм чет эллик томошабинларнинг ҳам севимлисига айланади.

Мультфильм айниқса Японияда машҳур — 2000 йиллар бошларида Чебурашка образига бўлган ҳуқуқлар ушбу мамлакатга берилади. 2010 йилда Токио телеканали Чебурашкага бағишланган 26 қисмли япон сериалини чиқарган бўлса, 2020 йил апрель ойида япон аниматорлари ушбу персонаж иштирокидаги биринчи фильмни 3D форматида намойиш қилган.

“Қор маликаси”, 1957 йил

Ҳанс Кристиан Андерсен эртаги асосида яратилган мультфильм энг яхши совет аниматорлари томонидан ишлаб чиқилган. “Қор маликаси” образи эса рассом Леонид Шварцман томонидан яратилган.

1960 йилда мазкур мультфильм Қўшма Штатларда намойиш этилади ва Уолт Дисней асарлари билан таққослашларга сабаб бўлди. Мультфильм Венеция (1957), Канн (1958) ва Римдаги (1958) халқаро кинофестивалларида совринларни қўлга киритган. Буюк япон аниматори Хаяо Миязаки эса уни ўзининг севимли анимацион фильмларидан бири деб атаган.

“Сеними, шошмай тур!”, 1969-1986

Доим қуённи таъқиб қилиб юрадиган бўри ҳақидаги ушбу анимацион фильм хорижий мамлакатларда Россиядагидан кам машҳур бўлмаган. Польша зарбхонаси совет мультфильмига бағишланган эсдалик танга ҳам чиқаради, Германияда “Ну Погоди” номли рок гуруҳи яратилади. Анимацион сериал Болгарияда ҳам катта шуҳрат қозонади.