Ivi онлайн кино платформаси мутахассислари бир қанча машҳур бўлган мультфильмларни кўришни ёки қайта кўришни тавсия қилмоқда. Улардаги асосий умумийлик — Янги йил ва сеҳрли даврда содир бўладиган мўжизалар ҳисобланади. Бир соат бўлса ҳам эртакларга ишониш имкониятини қўлдан бой берманг.
“Рождество ҳикояси”
Мультфильм британиялик ёзувчи Чарльз Диккенснинг 1843 йилда ёзилган эртаги асосида яратилган. Рождество ҳақидаги энг машҳур картиналардан бири саналади. Бош қаҳрамон зиқна Эбенезер пул келтирмайдиган ҳамма нарсага нафрат кўзи билан қарайди. Севги, дўстлик ва байрамлар — унинг фикрича барчаси вақтни беҳуда сарфлашдир. Рождество арафасида қўшимча дам олиш кунлари бўлиб, уни даромаддан маҳрум қилади. Лекин бир кечада чол ўзгариб, унда инсонийлик туйғуси уйғонади.
“Шимолий экспресс”
Бу ҳаракатни суратга олиш технологиясидан фойдаланган ҳолда яратилган дунёдаги биринчи мультфильмдир. Мультфильмга “Форрест Гамп” фильми режиссёри Роберт Земекис бошчилик қилган. Бош қаҳрамон ва яна бешта персонажга Том Хенкс овоз берган. Картина Санта Клаусга ишонмаган, лекин Рождество арафасида унинг олдига ташриф буюриш имкониятига эга бўлган бола ҳақида ҳикоя қилади. Унинг уйи ёнидан Шимолий қутбга бориш учун тўхтаган поезд Сантанинг уйига олиб боради.
“Қор маликаси”
Ҳанс Кристиан Андерсеннинг классик қишки эртаки асосида суратга олинган. Қор маликаси дунёни қандай қилиб мукаммал қилиш кераклиги ҳақида ўйлайди, аммо бунинг учун у барча ижодкорларни йўқ қилиши керак бўлади. Жасур қиз Герда ақл бовар қилмайдиган саёҳатни бошдан кечиради. У акаси Кайни ёвуз Қор маликасининг сеҳридан қутқариш учун боради. Картина рус кино ижодкорлари томонидан Wizart Animation студиясида тайёрланган ва йигирмадан ортиқ мамлакатда намойиш этилган.
“Кунларнинг бирида Токиода”
Ғамхўрлик ва мўжизалар ҳақидаги ушбу япон анимесининг сўзма-сўз таржимаси “Токиолик чўқинтирганлар”. Мультфильм қашшоқлик, очлик ва совуқда яшаётган учта уйсиз одам ҳақида ҳикоя қилади. Рождество арафасида улар янги туғилган қизчани ахлат уюмидан топади ва бефарқ ўтиб кетолмайди. Кундалик қийинчиликларга қарамай, улар чақалоқнинг фариштаси ва Рождество мўжизасининг яратувчиси бўлиб, автоматик равишда бошқа ҳаёт учун имкониятга эга бўлишларини ҳали англамаган ҳолда чақалоқнинг онасини топишга қарор қилади.
“Олафнинг саргузаштлари”
Бу мультфильм оила анъаналари қанчалик муҳим эканлиги ҳақида ҳикоя қилади. Опа-сингил Элза ва Анна Қиролликнинг барча аҳолиси учун Рождество зиёфатини уюштирди, лекин тезда Рождествони ўз оилаларида нишонлаш учун уйларига кетди. Маликалар хафа бўлишди, қувноқ ва чарчамайдиган қор одам Олаф опа-сингилларнинг байрамини сақлаб қолиш учун барча анъаналарни ўрганиш ва топиш учун саёҳатга чиқди.
“Махфий қорбобо хизмати”
Сеҳргар Санта Клауснинг атиги бир кечада икки миллиард совға топшириши ҳақида ҳикоя қиладиган анимацион фильмдир. Қорбобо — элфлар ўйинчоқлар ясайдиган фабрика эгаси. Шунингдек, унинг катта оиласи ҳам бор ва унинг барча аъзолари оилавий бизнес билан шуғулланади. Катта ўғли фақат ухлаб, отасининг ишини мерос қилиб олиш ҳақида ўйлайди. Лекин кичиги оддий почта бўлимида ишлайди. Мўжизаларга ишонади ва болаларнинг ҳеч бири совғасиз қолиб кетмаслигини хоҳлайди.
“Гринч” — Рождество ўғриси”
Гринч — хаёлий Ктоград шаҳарчаси яқинида яшовчи ва Рождествони ёмон кўрадиган ёвуз яшил мавжудот. Бу образ 1950 йилларда болалар ёзувчиси доктор Сеусс томонидан ўйлаб топилган. Шундан бери гоҳ ёвуз, гоҳида яхши Рождество эртаги қаҳрамони сифатида гавдаланади. Illumination студияси ўзига хос анимация услубида Гринчни дўст орттирмоқчи бўлган, лекин шаҳар аҳолиси уни рад этган маҳаллий бегона сифатида тасвирлайди. Йилдан йилга маҳаллий аҳолининг Рождествони қандай нишонлаши Гринчнинг ғазабини кучайтиради. Кунларнинг бирида у шаҳарликларнинг байрамини бузишга қарор қилади.
“Рождество олдидан даҳшатли туш”
Мультфильм режиссёри Тим Буртоннинг фалсафий қарашлари билан яратилган анимацион мусиқий фильмдир. Мультфильм мусиқасини энг машҳур кино бастакорларидан бири Дэнни Элфман ёзган. Воқеалар Хеллоуин шаҳарчасида бўлиб ўтади, унинг аҳолиси худди шу номдаги байрамни ўтказиш учун жавобгар ва улар одамларни қўрқитади. Жек Скеллингтон Хеллоуиннинг етакчиси бўлиб, йиллар давомида бир хилликдан зерикади. Кунлардан бир куни у Рождество шаҳрига бориб қолади ва байрам уни том маънода сеҳрлайди. Байрамни ўзи ташкил қилишга ҳаракат қилади, лекин буни ўзига хос усуллар билан амалга оширади. У Санта Клаусни ўғирлаб кетади ва болалар учун қўрқинчли совғалар тайёрлайди. Унинг яхши ниятлари фалокатга айланиши мумкин. Қоронғилик ва ёруғлик, гўзаллик ва қўрқув ўзаро боғлиқлиги туфайли бу картина болалар ва катталарни ўзига жалб қилади.
“101 та далматин”
Ушбу мультфильм дунёга энг эсда қоларли ёвуз образлардан бирини — шафқатсиз мода рамзи Круэлла де Вилни берди. 2021 йилда ҳатто ушбу персонажга атаб алоҳида фильм ҳам ишланди. Янги чиққан “101 та далматин” фильмлари фонида асл мультфильм бир оз четда қолди. Лекин фильм классик Disney қўл анимациясининг энг яхши намуналаридан биридир. Сюжетга кўра, ёш бастакор Рожер ўзининг далматин ити билан яшайди, бир куни сайр пайтида у ҳудди шундай ити бор Анитага дуч келади. Қаҳрамонлар бир зумда севишиб қолади ва тез орада бирга яшашни бошлайдилар. Рождествога яқинроқ уларнинг ити 15 та доғли кучукчаларни дунёга келтиради. Анитанинг мактабдаги дўсти Круэлла Де Вил бундан хабар топади ва орзусидаги мўйнали шуба учун итларни тортиб олишга қарор қилади.
Изоҳ (0)