2025 йилнинг декабрида шов-шувга сабаб бўлган корейс сериали “Калмар ўйини”нинг Америка версияси Лос Анжелесда суратга олинади. Бу ҳақда What’s on Netflix нашри маълум қилмоқда. “Калмар ўйини: Америка” деб номланган янги лойиҳа оригинали билан бир хил оламда кечади, бироқ воқеалар АҚШда содир бўлади.
Сериалнинг шоураннери машҳур “Етти” ва “Жангчилар клуби” фильмлари билан танилган режиссёр Девид Финчер бўлади. У лойиҳани Британиянинг “Утопия” сериали сценарийнависи Дэннис Келли билан ҳамкорликда ишлаб чиқмоқда. Финчернинг режиссёр сифатида ҳам иштирок этиши кутилмоқда, бироқ у Бред Питт билан “Клифф Бат саргузаштлари” фильмини суратга олиш билан банд бўлгани сабабли барча қисмларни шахсан бошқара олиши эҳтимолдан узоқ.
Сериал премераси тахминан 2027 йилга мўлжалланган. Лойиҳанинг асосий ролларидан бирини икки марта “Оскар” мукофоти соҳибаси Кейт Бланшетт ижро этади. Қизиғи шундаки, актриса оригинал сериалнинг якуний қисмида иштирокчиларни ёлловчи сирли шахс сифатида намоён бўлган эди.
Эслатиб ўтамиз, “Калмар ўйини” бутун дунё бўйлаб миллионлаб томошабинларни ўзига жалб қилган Netflix’нинг энг муваффақиятли лойиҳаларидан бирига айланди. Ҳозирда мухлислар америкалик ижодкорлар томонидан яратилган талқин асл нусханинг муваффақиятини такрорлай оладими-йўқми, деб тахмин қилмоқдалар.
Сюжет тафсилотлари ҳозирча сир тутилмоқда, бироқ сериалда корейс версиясини машҳур қилган маъюс эстетика ва таранг муҳит сақланиб қолиши маълум. Энди ижодкорлар Америка муҳитидаги ўлим ўйинлари иштирокчилари учун қандай янги синовларни тайёрлаганини фақатгина тахмин қилиш мумкин.
Изоҳ (0)