“Аслида вазият жуда жиддий” — Тўқаев Украинадаги уруш ҳақида

Қозоғистон президенти Қосим-Жўмарт Тўқаев Россия-Украина конфликти бўйича баёнот берди. Бу ҳақда Tengrinews хабар берди.

“Қозоғистон ва Россия дунёдаги энг узун қуруқлик чегарасига эга. Бизда ҳамкорлик анъаналари бор, хоҳ у савдо, хоҳ гуманитар алоқалар бўлсин, 2013 йилда мамлакатларимиз ўртасида иттифоқчилик муносабатлари тўғрисида шартнома имзоланган”, — деди Тўқаев.

Украина конфликтига келсак, Қозоғистон ҳарбий ҳаракатларни зудлик билан тўхтатиш ва БМТ низоми асосида тинчлик музокараларини ўтказиш тарафдори. 

“Бугун мен Германия канцлерига аслида вазият жуда жиддий эканини айтдим. Украина ва Россия томонлари музокараларга тайёр эканини даъво қилмоқда, бироқ музокаралар платформаси ҳали аниқ эмас”, — деди Тўқаев.

Шунингдек, Қозоғистон президенти қандай асосда музокаралар олиб бориш мумкинлиги аниқ эмаслигини билдирди.

“Шунинг учун оқилона, ​​рационал, доно дипломатия даври келади. Тинчлик музокараларида ҳар икки томон мақбул асос топиши учун ўзаро айбловларни тўхтатиб, музокаралар олиб бориш керак”.