«Дарё» нашри 21 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия президенти Владимир Путин бу йил парламентга мурожаат йўлламайди
2022 йилда Владимир Путиннинг Федерал Мажлисга мурожаати бўлмайди, у кейинги йилга кўчирилди, деб хабар берди «Коммерсантъ»га Россия президенти маъмуриятига яқин уч манба.Россия президенти маъмуриятидаги вазиятдан яхши хабардор манба журналистлар билан суҳбатда, фронтдаги вазият аниқ бўлганидан кейингина президент парламентда нутқ сўзлагани маъқулроқ эканини айтди.
«Владимир Путиннинг мурожаати ҳар доим келажакнинг маълум бир тасвири билан боғлиқ», — деб тушунтирди бошқа суҳбатдош. Унинг қўшимча қилишича, мурожаатда, жумладан, Украинадаги уруш ҳақида гапириш керак, бу ҳақда эса прогноз қилиш қийин бўлмоқда.
Кейинроқ Россия президентининг матбуот котиби Дмитрий Песков журналистларга Путин 2022 йилда Федерал Мажлисга мурожаат йўлламаслигини тасдиқлаган.
Айни вазиятда Россия Хавфсизлик кенгаши раиси ўринбосари, собиқ президент Дмитрий Медведев Хитой раҳбари Си Сзин Пин билан учрашди. Пекиндаги Давлат уйида бўлиб ўтган учрашувда Медведев Хитой раҳбарига Россия президенти Владимир Путиннинг мурожаатини етказди.
Собиқ президентнинг маълум қилишича мурожаатда «Россия—Хитой сиёсий мулоқоти ва амалий ҳамкорлигининг мисли кўрилмаган даражаси» қайд этилган.
Зеленскийнинг Вашингтонга ташрифидан қандай мақсадлар кўзланмоқда?
Украина президенти Владимир Зеленский 21 декабрь куни АҚШ президенти Жо Байден билан учрашиш учун Вашингтонга учиб кетган. Бу ҳақда CNN манбаларига таяниб хабар бермоқда.
Оқ уй Украина президенти Владимир Зеленский Вашингтонга ташриф буюришини ва Конгресс иккала палатасининг қўшма сессиясида нутқ сўзлаб чиқишини тасдиқлади. Оқ уйнинг юқори мартабали амалдори 20 декабрь кунги брифингда маълум қилишича: Бугунги учрашув чоғида икки давлат раҳбарлари фронтдаги кейинги ҳаракатлар, украиналик аскарларни тайёрлаш имкониятлари, Россияга қарши санкциялар ва экспорт назорати, иқтисодиёт ва энергетика соҳаларида ёрдам, шунингдек, гуманитар ёрдам масалаларини муҳокама қилади.
Айни вазиятда Оқ уй Украинага 2 миллиард долларлик янги ёрдам пакетини эълон қилди, унга Patriot ҳаво ҳужумига қарши мудофаа батареялари киради.
Қозоғистон ҳукумати Уч томонлама газ иттифоқининг тузилиши, унга таклиф қилинадиган шартларга боғлиқ бўлишини айтди
Қозоғистон Россиядан Қозоғистон, РФ ва Ўзбекистон ўртасида газ иттифоқи бўйича алоҳида ташкилот тузиш ҳақида қандайдир расмий таклифлар олмаган. Ҳозирча бу газ савдоси жараёнларини интеграциялаш бўйича бир ғоя, холос. Бу ҳақда Қозоғистон ташқи ишлар вазири ўринбосари Алмас Айдаров маълум қилди.
Унинг таъкидлашича, ҳамма нарса Қозоғистонга таклиф қилинадиган шартларга боғлиқ бўлади. Қозоғистон ташқи ишлар вазири ўринбосарининг сўзларига кўра, газ бўйича алоҳида тузилма ёки давлатлараро иттифоқ тузиш масаласи ҳозирча кўтарилгани йўқ.
Ноябрь охирида Россия ва Қозоғистон президентлари Владимир Путин ва Қосим-Жўмарт Тўқаев Москвада учрашув ўтказиб, Россия, Қозоғистон ва Ўзбекистон иштирокида «уч томонлама газ иттифоқи» тузишни муҳокама қилди.
Ўзбекистон-Афғонистон йўлидаги транспорт логистика хаби халқаро мақом оладими?
БМТ Хавфсизлик Кенгашининг Афғонистондаги вазиятни муҳокама қилишга бағишланган йиғилишида Ўзбекистоннинг БМТдаги доимий вакили ўринбосари, Муваққат ишлар бўйича вакил Нурилла Абдуллаев Ўзбекистон томонидан Афғонистонда узоқ муддатли тинчлик ўрнатиш борасида амалга оширилаётган чора-тадбирлар ҳақида маълумот берди, деб хабар қилмоқда «Дунё» АА.
Ўзбекистон Толибон ҳаракати билан мулоқот орқали сўнгги 25 йил ичида биринчи марта шимолий вилоятларда қизлар учун мактаблар очишга, Покистон денгиз бандаргоҳларига ва Афғонистон орқали юк транзитини йўлга қўйишга муваффақ бўлди. Шу билан бирга, ўтган 10 ой давомида мазкур транзит йўналиши бўйича ҳар икки йўналишда 600 минг тоннага яқин юк ташилган бўлиб, ҳеч қандай хавфсизлик ҳодисаси кузатилмаган.
Термиз шаҳридаги кўп функцияли транспорт-логистика хаби орқали ушбу йўналишдаги халқаро саъй-ҳаракатлар мувофиқлаштирилаётгани қайд этилиб ушбу хабга БМТ шафеълигида халқаро мақом бериш таклифи билдирилди.
Шунингдек йиғилишда, Жаҳон ҳамжамияти афғонлар тақдири, бу мамлакат келажаги учун маънавий жавобгарликни ўз зиммасига олиши ва бу мамлакатнинг қайта изоляция қилинишига йўл қўймаслик кераклиги эслатилди. Айни вазиятда «Толибон» ҳаракати Афғонистондаги университетларни аёллар учун ёпгани ҳам кўплаб муҳокамаларга сабаб бўлмоқда
Изоҳ (0)