Вьетнамда Кажики тўфони 3 кишини ҳаётдан олиб кетди, яна 10 киши жароҳатланди. Бу ҳақда расмийлар 26 август куни маълум қилди.
Мамлакат ҳукумати кучли ёмғир сув тошқинлари ва кўчкиларга сабаб бўлишидан огоҳлантирмоқда. Хабар қилинишича, тўфон 7 мингга яқин уйга зарар етказган, 18 минг дарахтни қўпориб ташлаган ва 28,8 минг гектар шоли майдонини сув босган. Шунингдек, 331 та электр устуни қулаши оқибатида Тҳанҳ Ҳоа, Нгҳе Ан, Ҳа Тинҳ, Тҳаи Нгуен ва Пҳу Тҳо провинциялари электр таъминотидан узилиб қолган.
Об-ҳаво агентлигига кўра, Кажики 25 август куни тушдан кейин Вьетнамнинг шимолий марказий қирғоғига ёпирилган. Шундан сўнг, тўфон эртаси куни эрталаб Лаосга қараб ҳаракатланаётганда бир оз заифлашган.
Мамлакат шимолидаги бир қанча ҳудудларда ёмғир ёғиши яна давом этади, баъзи жойларда 6 соат ичида 150 миллиметргача ёғин бўлиши мумкин. Бу эса сел ва кўчкиларга олиб келиши прогноз қилинмоқда. Бундан олдинроқ Вьетнам ҳукумати тўфон сабабли 586 мингдан ортиқ аҳолининг хавфсиз ҳудудларга эвакуация қилинишини маълум қилганди.
Кажики 24 август куни Вьетнамга ёпирилишидан олдин Хитойнинг Хайнан оролининг жанубий қирғоқларини айланиб ўтган. Оролдаги Саня шаҳрида корхоналар ва жамоат транспортининг фаолияти тўхтатилган. Табиий офат ҳудудда 102 минг инсоннинг ҳаётига салбий таъсир этмоқда.
Изоҳ (0)