“Ким Чен Ин билан шу йил учрашмоқчиман” — Трамп

АҚШ президенти Дональд Трамп шу йил Шимолий Корея етакчиси Ким Чен Ин билан учрашмоқчи эканини айтди. Бу ҳақда Al Jazeera хабар берди.

Сиёсатчи мазкур режасини Жанубий Кореянинг янги президенти Ли Чже Мюнг билан учрашув чоғида эълон қилди. Трамп шу пайтгача КХДР раҳбари билан уч марта учрашган.

Мен у билан шу йил учрашишни истардим. Келгусида Ким Чен Ин билан учрашишни интиқлик билан кутаман. У менга жуда яхши муносабатда бўлган эди, деган Трамп.

АҚШ президенти Ким Чен Инни “синглисидан ташқари бошқа ҳамма одамдан кўра яхшироқ билишини” таъкидлаган.

Умид қиламанки, сиз дунёдаги ягона бўлинган мамлакат — Корея яриморолига тинчлик олиб келасиз ва Ким Чен Ин билан учрашасиз. Шунингдек, Шимолий Кореяда Трумп Тоwер қурасиз, мен эса у ерда голф ўйнайман, деган Жанубий Корея президенти.

Трамп учрашув чоғида Жанубий Корея ҳудудида жойлашган, 28 500 нафар америкалик аскар хизмат қилаётган ҳарбий база ерларига эга чиқиш ҳақида гапирди.

Биз база қуришга жуда кўп пул сарфладик, Жанубий Корея ҳам маълум ҳиссасини қўшди. Лекин мен ижарадан воз кечиб, улкан ҳарбий базамиз жойлашган ерларга эгалик қилиш имкониятини кўришни истардим, деди Трамп.

Бу Ли Чже Мюнгнинг президент сифатида Оқ уйга илк ташрифи бўлди. У 2024 йил охирида қисқа муддатга ҳарбий ҳолат жорий қилган собиқ президент Юн Сук Ёл импичмент қилингани ортидан июнь ойида сайланган эди. Юн эса ҳозир исён уюштиришда гумонланиб ҳибсда сақланмоқда.