Тожикистон ташқи қарзининг 96,5 фоиздан ортиғи бевосита ҳукумат қарзи бўлиб, 2021 йил 1 январь ҳолатига кўра, 3 миллиард 132,4 миллион долларни ташкил этадиган мазкур маблағ давлат хизматларининг амалга оширилишини таъминлайди. Бу ҳақда Asia-Plus хабар берди.
Шунингдек, республиканинг ташқи қарзлари таркибига қуйидагилар киради:
- давлат кафолати билан олинган қарзлар — 96,3 миллион доллар;
- тўлов балансини қўллаб-қувватлаш учун Халқаро валюта фонди (ХВФ)дан қарздорлик — 11,3 миллион доллар;
- Тожикистон Миллий банки томонидан Хитойдан олинган қарз — 2,0 миллион доллар;
- Миллий тараққиёт банки томонидан Ислом тараққиёт банкидан олинган қарз — 1,7 миллион доллар.
Тожикистон Молия вазирлигининг маълумотларига кўра, 2020 йилда ташқи қарзга хизмат кўрсатиш учун 190 миллион доллардан ортиқ бюджет маблағлари ажратилган бўлиб, 2021 йилда асосий ташқи қарзни молиялаштириш учун (фоизларсиз) қарийб 1,5 миллиард сомоний (бугунги курс бўйича 133 миллион доллар) ажратиш режалаштирилган.
Тожикистоннинг ташқи қарзлар бўйича асосий кредитори Хитой (1,2 миллиард доллар) ҳисобланади.
Мамлакатнинг халқаро молия бозорларида давлат заёмларини жойлаштириш билан боғлиқ қарзи 500 миллион долларни ташкил этади.
Шунингдек, Тожикистоннинг Жаҳон банки, Осиё тараққиёт банки, Ислом тараққиёт банки ва ХВФдан нисбатан катта миқдорда қарзлари мавжуд.
Аввалроқ Тожикистон ҳукуматига давлат бюджетини қўллаб-қувватлаш учун 2020 йилда халқаро молия институтлари томонидан 342 миллион доллар (2020 йилдаги ўртача расмий курси бўйича, тахминан, 3,6 миллиард сомоний) ажратилгани ҳақида хабар берилганди. Тожикистон Молия вазирлиги ушбу маблағ устувор ижтимоий соҳани молиялаштиришга сарфланганини таъкидлаган.
Изоҳ (0)