Франция президенти Эммануэл Макрон Исроилга Ғазо секторида қўлланиладиган қуролларни етказиб беришни тўхтатишга чақирди.
“Бизнинг сиёсий ечимга қайтишимиз, Ғазодаги жанглар учун қурол етказиб беришни тўхтатиш устувор вазифадир”, дейди Франция етакчиси.
Макроннинг қўшимча қилишича, ҳозир Франция ҳукуматининг асосий вазифаларидан яна бири эскалацияга йўл қўймасликдир.
Апрель ойида Франция қуролли кучлари вазири Себастьян Лекорну Франциянинг Исроилга қурол сотиш мамлакат мудофаа экспортининг жуда кичик қисмини – 0,2 фоизни ташкил этишини маълум қилган.
1 октябрга ўтар кечаси Исроил армияси Ливан жанубидаги чегара ҳудудларида “Шимол ўқлари” номли қуруқликдаги операцияси бошланганини эълон қилган эди.
Макрон АҚШни Ливанда 21 кунлик ўт очишни тўхтатишга рози бўлиши учун Исроилга босим ўтказишни сўраган. Макрон Исроилнинг бу мамлакатга бостириб кириши жиддий хато бўлишини айтган.
“Мен ишонаманки, АҚШ Исроил бош вазирига босимни кучайтириши керак. Агар Нетаньяху рад этса, Франция бу масалани БМТ Хавфсизлик кенгашига кўтаради. Биз барча ҳамкорларимизнинг бу аниқ хабарни етказишда овозлари баланд ва бизга содиқ бўлишларини кутмоқдамиз: Исроил Ливанга бостириб кириши мумкин эмас. Ҳозирги кунда Ливанда уруш бўлиши мумкин эмас; бу жуда катта хато ва вазиятни кескинлаштириш хавфини туғдиради”, деган эди Франция етакчиси.
Изоҳ (0)