АҚШ ҳукумати Яқин Шарқда “зудлик билан ўт очишни тўхтатиш”га чақирувчи резолюция лойиҳасини БМТ Хавфсизлик кенгашига тақдим этди. Вашингтон ҳужжат қуролли можарога барҳам беришда “кучли сигнал” бўлишига умид қилмоқда. Бу ҳақда Bild хабар берди.
“Биз ҲАМАС томонидан гаровга олинганларни озод қилиш билан бирга зудлик билан ўт очишни тўхтатишга чақирувчи резолюцияни Хавфсизлик кенгаши кўриб чиқиши учун тақдим этдик”, — деди АҚШ Давлат котиби Энтони Блинкен.
АҚШ бунгача БМТ Хавфсизлик кенгашида зудлик билан ўт очишни тўхтатиш ҳақидаги чақириқларга вето қўйганди. Гаровга олинган 100 дан ортиқ исроиллик ҳақида Блинкен “музокаралар столида жуда кучли таклиф бор”, деган. У ҲАМАС ва Исроил умумий келишувга яқинлашаётганини айтмоқда.
Айни пайтда Исроил Ғазо сектори жанубидаги Рафаҳ шаҳрига қарши ҳужумни режалаштиришда давом этмоқда. Исроил бош вазири Бенямин Нетаньяху режага содиқ қолиши, аммо унга тайёргарлик бир оз вақт талаб этишини айтган.
“Биз яқин орада тинч аҳолини жанговар зоналардан эвакуация қилиш режасини ҳам тасдиқлаймиз”, — дея қўшимча қилган Нетаньяху.
АҚШ мудофаа вазири Ллойд Остин 20 март куни исроиллик ҳамкасби Йоав Галантдан қуруқликдан ҳужум қилишнинг муқобил вариантларини кўриб чиқишни сўраганди.
Изоҳ (0)