16 октябрь куни кечқурун Нью-Йоркда БМТ Хавфсизлик кенгаши Россиянинг Яқин Шарқдаги можаро кескинлашувига оид резолюция лойиҳасини рад этди.
Йиғилишда Россия ва Бразилиянинг икки рақобатчи лойиҳаси овозга қўйилиши керак эди. Лойиҳалар тақдим этилишидан олдин йиғилиш тўхтатилди — Бирлашган Араб Амирликлари доимий вакилининг илтимосига кўра, Хавфсизлик кенгашининг 15 нафар аъзоси ёпиқ эшиклар ортидаги қўшимча маслаҳатлашувлар учун чиқиб кетди.
Россия томонидан таклиф қилинган лойиҳада “гуманитар оташкесим” ва Ғазо секторидаги гаровга олинган исроилликларни озод қилишга чақирилган, бироқ ҲАМАС гуруҳининг ҳужуми тўғридан тўғри қораланмаган. БМТ Хавфсизлик кенгашига раислик қилаётган Бразилиянинг резолюция лойиҳаси бўйича овоз бериш 17 октябрь оқшомига қолдирилди.
Хавфсизлик кенгашидаги келишмовчиликлар
Россия резолюцияси кенгашнинг 15 аъзосидан атиги бештаси томонидан қўллаб-қувватланди; резолюцияни қабул қилиш учун зарур бўлган минимал миқдор — тўққизта овоз, бундан ташқари, унга ҳеч ким вето қўймаслиги керак. Маълумотларга кўра, маслаҳатлашувлардан сўнг Бразилия ўз матнини тўғрилаган, ўзгаришларни Буюк Британия, Франция ва БАА талаб қилган. Бироқ Бразилия лойиҳасининг қабул қилиниши ҳам сўроқ остида.
Дипломатик доираларга кўра, Россия таклиф қилган ҳужжат зудлик билан ўт очишни тўхтатишга чақиради ва тинч аҳолига қарши қаратилган ҳар қандай зўравонлик ва ҳарбий ҳаракатларни, шунингдек, барча “терроризм актларини қатъий қоралашни” ўз ичига олади, унда ҲАМАС ҳақида гапирилмаган.
Ўз навбатида, Бразилия резолюция лойиҳаси “гуманитар пауза”га чақиради, зўравонлик, тинч аҳолига қарши ҳарбий ҳаракатларни, шунингдек, “ҲАМАС ҳужумларини” қоралайди. Шу билан бирга, Бразилия таклифи номи очиқ айтилмаган Исроилни Ғазо сектори шимолидан тинч аҳолини эвакуация қилиш талабини бекор этишга чақиради.
Ўтган ҳафта охирида, 7 ва 8 октябрь кунлари ҲАМАСнинг Исроилга ҳужумидан сўнг чақирилган БМТ Хавфсизлик кенгашининг фавқулодда йиғилиши ҲАМАС ҳаракатларини қораламаган ҳолда якунланди. Кейинроқ, 13 октябрь куни Хавфсизлик кенгаши иккинчи мажлисини ёпиқ эшиклар ортида ўтказди, бироқ ягона ёндашувни ишлаб чиқа олмади.
БМТ бош котиби Ғазо секторида эвакуацияни имконсиз деб ҳисоблайди
Аввалроқ БМТ бош котиби Антониу Гутерриш Исроилнинг Ғазо секторидан тинч аҳолини 24-соат ичида эвакуация қилиш талабини имконсиз деб атаганди. Бирлашган Миллатлар Ташкилотининг фикрича, бундай қадамни талаб қилиш оқибатлари ҳуманитар фалокатга олиб келиши мумкин.
Изоҳ (0)