АҚШ БМТ Хавфсизлик кенгашининг Ғазо секторида зудлик билан ўт очишни тўхтатишни талаб қилувчи яна бир резолюциясига вето қўйди. ҲАМАС бунга муносабат билдирди. Бу ҳақда Deutsche Welle хабар берди.
Резолюция лойиҳаси Жазоир томонидан тайёрланган ва Хавфсизлик кенгашининг амалдаги 15 аъзосидан 13 нафари уни қабул қилиш учун овоз берган. Бирлашган Миллатлар Ташкилоти олий органининг яна бир доимий аъзоси Британия эса бетараф қолган.
Бу АҚШ ветоси туфайли муваффақиятсизликка учраган учинчи резолюциядир. АҚШнинг БМТдаги элчиси Линда Томас-Гринфилднинг айтишича, Жазоир таклиф қилган резолюциянинг қабул қилиниши “барқарор тинчликка эришишга йўл қўймайди ва аслида тескари таъсир кўрсатиши мумкин”.
У Вашингтон “нозик музокараларни хавф остига қўядиган” резолюцияни қўллаб-қувватламаслигини таъкидлаган. АҚШ Ғазо сектори бўйича ўз резолюцияси лойиҳасини илгари сурган, унда “Ғазо секторида амалда имкон қадар тезроқ вақтинчалик ўт очишни тўхтатиш” талаб қилинади. АҚШ президенти Жо Байден 12 февраль куни Исроил ва ҲАМАС ўртасида олти ҳафталик сулҳ тузишга чақирган эди.
ҲАМАС муносабати
ҲАМАС тегишли резолюцияга вето қўйилиши Вашингтоннинг Исроилга яна “қирғинлар” уюштириши учун яшил чироқ кўрсатишини айтди. Фаластин гуруҳи АҚШнинг бу ҳаракатини Ғазодаги урушни тўхтатиш бўйича халқаро саъй-ҳаракатларга асосий тўсиқ, деб атади.
“Бу вето Исроил кун тартиби фойдасига ишламоқда ва халқаро миқёсда халқимиз азобини тўхтатишга тўсқинлик қилмоқда”, — дейилади ҲАМАС баёнотида.
Изоҳ (0)