Бирлашган Миллатлар Ташкилоти Хавфсизлик Кенгашида Ғазодаги уруш бўйича резолюцияга овоз бериш яна қолдирилди. Бу ҳақда “РИА Новости” хабар берди.
Дипломатик манбаларга кўра, БМТ Хавфсизлик Кенгаши ҲАМАС ва Исроил ўртасидаги уруш бўйича резолюцияга овоз беришни яна бир бор кечиктирди. Резолюцияни тайёрлаш жараёнида бир қатор таклифларга қарши чиққан АҚШ уни ҳозирги шаклда қўллаб-қувватлашга тайёрлигини билдирганига қарамай, овоз бериш қолдирилди.
Бир неча кунлик кечикишлар ва узоқ давом этган муҳокамалардан сўнг, сўнгги лойиҳа “зудлик билан хавфсиз ва тўсиқсиз гуманитар киришни таъминлаш, шунингдек, ҳарбий ҳаракатларни барқарор тўхтатиш учун шароит яратиш бўйича шошилинч чоралар кўриш”ни талаб қилади.
Резолюция лойиҳаси БАА томонидан таклиф қилинган ва Вашингтон кескин норозилик билдирган асл нусхада бўлгани каби ҳарбий ҳаракатларни зудлик билан тўхтатишга чақирмайди. АҚШнинг БМТдаги элчиси Линда Томас-Гринфилд журналистларга резолюция ҳозирги кўринишида таклиф қилинса, Вашингтон уни қўллаб-қувватлаши мумкинлигини айтди.
“Бу араб гуруҳи томонидан тўлиқ қўллаб-қувватланган жуда кучли резолюция”, — деган у.
Резолюцияга овоз бериш яна қолдирилгани сабаби аниқ маълум эмас. Хавфсизлик кенгашининг вето ҳуқуқига эга доимий аъзоси бўлган АҚШ томонидан қўллаб-қувватланган Исроил резолюцияда “сулҳ” атамасини қўллашга қарши.
Times of Israel манбалари овоз бериш йўлидаги асосий тўсиқлардан бири БМТнинг Ғазо секторига келаётган ёрдамни назорат қилиш механизмини яратиш таклифи эканини таъкидлаганди. Кўринишидан, бу талаб бекор қилинган.
Изоҳ (0)