Ғазо секторида можаро бошланганидан бери ҳалок бўлган БМТ ходимлари сони 241 нафарга етди. Бу ҳақда БМТнинг Фаластин ҳудудларидаги гуманитар масалаларни мувофиқлаштириш бошқармаси маълум қилди.
Унга кўра, ҳалок бўлганларнинг 237 нафари БМТнинг Фаластинлик қочқинларга ёрдам кўрсатиш агентлиги (UNRWA) ходимларидир. Шунингдек, Жаҳон соғлиқни сақлаш ташкилоти, Ривожланиш дастури, Лойиҳа хизматлари бюроси ва БМТнинг Қўриқлаш ва хавфсизлик бошқармасидан биттадан киши Ғазода ҳалок бўлган.
Ҳисоботга кўра, Ғазода БМТдан ташқари турли халқаро гуманитар ташкилотларнинг 326 нафар ходими ҳалок бўлган, улардан 33 нафари Фаластин Қизил ярим ой жамиятининг ишчилари ва кўнгиллилар ҳисобланади.
Ғазо ССВ баёноти
Кеча Ғазо Соғлиқни сақлаш вазирлиги сўнгги икки кун ичида Исроил ҳарбий ҳаракатлари оқибатида 60 дан ортиқ фаластинлик ҳалок бўлгани, 150 га яқини яралангани ҳақида хабар берганди.
Шунингдек, вазирликнинг таъкидлашича, ўтган йилнинг октябрь ойида Исроил ҳарбий амалиёти бошланганидан бери Ғазонинг турли ҳудудларида жами 43 665 фаластинлик ҳалок бўлган, 103 076 киши жароҳатланган.
7 октябрь воқеалари
2023 йил 7 октябрда Ғазо секторидан Исроил ҳудудига Фаластин ҲАМАС ҳаракатининг қуролли жангчилари кириб келиши ва аҳолининг гаровга олиниши туфайли Яқин Шарқдаги вазият кескин ёмонлашди.
Бунга жавобан Исроил анклавда “ҲАМАСнинг ҳарбий ва сиёсий тузилмаларини йўқ қилиш ва ўғирлаб кетилганларнинг ҳаммасини озод қилиш” мақсадида операция бошлади.
Ғазо секторидаги жанглар шу кунгача давом этмоқда.
Изоҳ (0)