Россия ва Хитой Яқин Шарқдаги вазият бўйича АҚШ таклиф қилган резолюция лойиҳасига вето қўйди

Россия ва Хитой БМТ Хавфсизлик кенгашининг Яқин Шарқдаги вазият бўйича АҚШ томонидан таклиф этилган резолюция лойиҳасига вето қўйди.

“ТАСС” маълумотларига кўра, ҳужжатни ўнта давлат қўллаб-қувватлаган, Россия, Хитой ва Бирлашган Араб Амирликлари бунга қарши чиққан. Яна икки давлат бетараф қолган.

АҚШ таклиф этган резолюцияда ҲАМАСнинг Исроилга ҳужуми қораланади, шунингдек, гаровга олинганларни озод қилиш ва халқаро гуманитар қонунларга риоя қилишга чақирилади. Ҳужжат ўт очишни тўхтатишга чақирмайди, балки мамлакатларнинг ўзини ҳимоя қилиш ҳуқуқини тан олади, деб ёзади агентлик.

Шу билан бирга, Reuters аниқлик киритишича, ҳужжат Ғазо секторига гуманитар ёрдам етказилишига рухсат бериш учун ҳарбий ҳаракатларни тўхтатишни талаб қилади.

Россиянинг Яқин Шарқдаги уруш бўйича резолюция лойиҳаси ҳам қабул қилинмади — у керакли миқдордаги овозларни ололмади. Тўрт делегация “маъқул”, иккитаси “қарши” овоз берди. Яна тўққиз киши бетараф қолди.

18 октябрь куни Қўшма Штатлар Бразилия томонидан тайёрланган, Ғазо секторига гуманитар ёрдам етказилишига рухсат бериш учун жанговар ҳаракатларни тўхтатишга чақирувчи резолюция лойиҳасига вето қўйганди. Бунгача овоз бериш икки марта қолдирилди, деб ёзади Reuters.

Аввал БМТ Хавфсизлик кенгаши Россиянинг ўт очишни тўхтатиш тўғрисидаги резолюция лойиҳасини қабул қилмаганди, бунга сабаб — ҳужжатда Исроилга ҳужум қилган ҲАМАС ҳаракати ҳақида сўз юритилмаган.