Бирлашган Миллатлар Ташкилоти Бош ассамблеяси Фаластин—Исроил можароси бўйича Миср ва Мавритания томонидан тақдим этилган резолюцияни қабул қилиш учун овоз берди. Резолюцияда ўт очишни тўхтатиш талаби бор. Унинг қабул қилиниши учун 153 давлат, жумладан, Ўзбекистон овоз берди. 10 та давлат, жумладан Исроил, АҚШ ва Австрия қарши чиқди.
БМТ пресс-релизида айтилишича, ўт очишни тўхтатиш учун овоз берганлар орасида Россия, Эрон, Хитой Бразилия, Испания, Куба, Бирлашган Араб Амирликлари, Саудия Арабистони, Франция, Швейцария ва Швеция ҳам бор. 23 давлат, жумладан, Буюк Британия, Германия ва Украина бетараф қолди.
Учрашувда БМТ Бош Ассамблеяси АҚШ ва Австрия томонидан киритилган тузатишларни рад этди. Улардан биринчиси Фаластиннинг ҲАМАС ҳаракатини қоралашни талаб қилган бўлса, иккинчиси гаровга олинганлар ҲАМАС ва бошқа гуруҳлар қўлида ушлаб турилганига эътибор қаратади.
Қабул қилинган ҳужжатнинг асосий нуқталари ўт очишни тўхтатиш ва халқаро ҳуқуқ нормаларига риоя қилиш талаби эди. Хусусан, у барча гаровга олинганларни озод қилишни ва Ғазо секторига инсонпарварлик ёрдами етказилишини талаб қилади.
9 декабрь куни АҚШ БМТ Хавфсизлик кенгаши йиғилишида Ғазо секторида зудлик билан ўт очишни тўхтатиш бўйича резолюцияга вето қўйди. Қўшма Штатлар БАА делегацияси томонидан тақдим этилган резолюцияга қарши овоз берган ягона кенгаш аъзоси бўлди. Яна 13 давлат, жумладан, Россия, Хитой ва Франция ёқлаб овоз берган, Британия эса бетараф қолган.
Изоҳ (0)