Шавкат Мирзиёев икки муқаддас масжид ходими — Саудия Арабистони подшоҳи Салмон бин Абдулазиз Ол Сауднинг таклифига биноан 11 ноябрь куни амалий ташриф билан ушбу мамлакатга жўнаб кетди, деб хабар бермоқда Президент матбуот хизмати.
Ташриф дастурига мувофиқ, давлат раҳбари Ар-Риёд шаҳрида Ғазо ва Ливандаги вазиятнинг кескинлашуви ҳамда Яқин Шарқдаги можарога тез фурсатда ечим топиш чораларини ишлаб чиқишга бағишланган навбатдан ташқари Араб-ислом саммитида иштирок этади ва нутқ сўзлайди.
12—13 ноябрь кунлари Ўзбекистон етакчиси Озарбайжон президенти Илҳом Алиевнинг таклифига кўра БМТнинг Иқлим ўзгариши бўйича ҳадли конвенцияси томонлари конференциясининг 29-сессияси (CОП29) тадбирларида ҳам қатнашади.
Шавкат Мирзиёев 2023 йил 3 октябрь куни Остонада бўлиб ўтган Туркий давлатлар ташкилоти саммитида Фаластин—Исроил муаммосининг ягона ва энг адолатли ечимини айтганди.
“Мазкур муаммонинг ягона ва энг адолатли ечими — низони "икки халқ учун икки давлат" тамойили асосида ҳал этишдир”, деган эди президент.
Давлат раҳбарининг таъкидлашича, Фаластин халқи БМТ резолюцияларида белгиланганидек, мустақил давлат барпо этиш ҳуқуқига эга.
Шавкат Мирзиёев 2024 йил 6 ноябрь куни Туркий давлатлар ташкилоти давлат раҳбарлари кенгаши мажлисида сўзлаган нутқида ҳам Яқин Шарқдаги низога тўхталиб ўтганди.
“Мазкур кўп йиллик низонинг ягона ечими халқаро меъёрий ҳужжатлар ва резолюцияларга мувофиқ, 1967 йилдаги чегаралар асосида, пойтахти Шарқий Қуддус бўлган мустақил Фаластин давлатини тузишдир”, деган эди президент.
Давлат раҳбари Ғазо сектори ва Ливандаги мисли кўрилмаган гуманитар фожиани, тинч аҳолига қарши вайронкор ҳужумларни, айниқса, бегуноҳ болалар, кексалар ва аёллар қурбон бўлаётганини ҳеч нарса билан оқлаб бўлмаслигини таъкидлади. Бирлашган Миллатлар Ташкилотининг Фаластин қочоқларига ёрдам бериш бўйича махсус агентлиги фаолиятини чеклашга қаратилган ҳаракатларни ҳам кескин қоралади.
Изоҳ (0)