АҚШнинг сайланган президенти Дональд Трамп ва Россия президенти Владимир Путин телефон орқали мулоқот қилгани ҳақидаги хабарлар ҳақиқатга тўғри келмайди. Бу ҳақда Кремль матбуот котиби Дмитрий Песков баёнот берди.
“Ҳеч қандай суҳбат бўлмади. Бу мутлақо ёлғон маълумот”, деди Песков журналистларнинг тегишли саволига жавоб берар экан.
Аввалроқ The Washington Post нашри манбаларга таяниб, Путин ва Трамп 7 ноябрь куни телефон орқали гаплашгани ҳақида хабар берган эди. Унга кўра, америкалик сиёсатчи Флоридадаги курортидан шахсан Россия президентига қўнғироқ қилган. Суҳбат давомида Трамп “Украинадаги урушни янада кескинлаштирмасликни маслаҳат берган” ва унга “Вашингтоннинг Европада сезиларли армияси мавжудлиги ҳақида эслатиб ўтган”.
Трамп, шунингдек, урушнинг “тез орада ҳал этилиши”ни муҳокама қилиш учун Путин билан кейинги алоқалардан манфаатдорлигини билдирган.
“АҚШнинг янги сайланган президенти ‘шахсий тарзда’ Россиянинг ‘айрим босиб олинган ҳудудлар’ устидан назоратни сақлаб қолиши вариантини қўллаб-қувватлаши мумкинлигини билдирган ва Путин билан суҳбатда бу масалага тўхталиб ўтган”, деб ёзган WP.
Суҳбат расмий бўлмаган — Трампнинг ўтиш гуруҳи АҚШ Давлат департаменти кўмагида президент қўнғироқларини ўтказишга имкон берадиган ҳужжатларни ҳали имзоламаган. Бундан ташқари, Трамп ўзининг биринчи президентлик муддати давомидаги қўнғироқлари стенограммаларининг ошкор этилганидан сўнг давлат аппарати амалдорларига ишончсизлик билан қарамоқда.
Украина суҳбатдан хабардор бўлганини рад этди
Худди шу мақолада Трампнинг Путинга қўнғироғи ҳақида Украина ҳукумати хабардор қилингани таъкидланган. Икки номаълум манба Киевда бу суҳбатга эътироз билдирилмаганини айтган.
“Украина расмийлари Трамп Путин билан Украина учун дипломатик ечим бўйича ҳамкорлик қилишини аллақачон тушунган”, деган улар.
Украина Ташқи ишлар вазирлиги бу маълумотлар ҳақиқатга тўғри келмаслигини маълум қилган.
Украина томони тахмин қилинаётган қўнғироқ ҳақида олдиндан хабардор қилингани бўйича хабарлар ёлғон. Шунга кўра, Украина қўнғироқни маъқуллай олмас ёки қарши чиқмас эди, деди Украина идораси расмий вакили Георгий Тихий.
Изоҳ (0)