Украина иттифоқчилари президент Владимир Зеленский урушни тугатиш шартларига бўлган ёндашувини ўзгартириши мумкинлигини тахмин қилмоқда. Бу ҳақда Bloomberg хабар берди.
НАТОдаги юқори мартабали амалдорлар ҳозирда альянс ҳарбий ҳаракатларни якунлаш йўлларини излаётганини айтди. Зеленский Украинанинг асосий талаблари — Россия қўшинларини тўлиқ олиб чиқиш ва НАТОга аъзо бўлиш эканини очиқ айтган бўлса-да, суверенитет ёки ҳудуд бўйича ҳар қандай ён беришни ҳам истисно қилган.
Бироқ мамлакат урушнинг учинчи қишига тайёргарлик кўраётгани ва Ғарбнинг қўллаб-қувватлаши заифлаша бошлаганини ҳисобга олиб, Украина расмийлари можарони тугатиш стратегияси бўйича муҳокамаларни бошлаш зарурлигига ишора қилди, дейилади хабарда.
Бу “Рамштайн” форматидаги учрашувда батафсил муҳокама қилиниши кутилганди. Аммо АҚШ президенти Жо Байден Флорида штатига яқинлашиб келаётган “Милтон” тўфони туфайли ташрифини бекор қилган. Шу билан бирга, Зеленский урушни адолатли якунлаш учун аниқ қадамларни ўз ичига олган “ғалаба режаси”га қўллаб-қувватлов олишга интилмоқда.
АҚШ расмийлари Киевдан 2025 йил учун ҳарбий ва молиявий ёрдамни ўз ичига олган ҳаракатлар режасини ишлаб чиқишни сўраган. Зеленский иттифоқчилар билан маслаҳатлашгандан сўнг режа тафсилотларини тақдим этишни ваъда қилган.
Бироқ, баъзи Ғарб ҳамкорлари урушнинг якунини аниқроқ тасаввур қилиш учун Украинага босим ўтказаётганига қарамай, у ҳудудий ён бериш имкониятини қатъиян рад этмоқда, дейилади хабарда.
7 октябрь куни Владимир Зеленский шундай деганди:
Биз ҳамкорларимизни ушбу урушнинг қандай якунланишини, Украинанинг глобал хавфсизлик тизимидаги ўрнини ва бу урушни тугатишга олиб келиши мумкин бўлган биргаликдаги қадамларни қандай тасаввур қилишларини белгилашга таклиф этамиз.
Киев ҳали “ғалаба режаси”нинг барча тафсилотларини ошкор қилмаган. Украинанинг НАТОга аъзолиги иттифоқчиларни ажратиб турувчи асосий масалалардан бири бўлиб қолмоқда. Расмийларга кўра, Украина альянсга қўшилиш учун Байденга тўғридан-тўғри таклиф юбориши борасида босим ўтказилмоқда.
Гарчи АҚШ президентининг бундай йўл тутиши эҳтимолдан узоқ бўлса-да, таклиф Кремль иштирокидаги ҳар қандай музокаралар учун потенциал восита сифатида кўрилмоқда.
Шу билан бирга, айрим таҳлилчиларнинг фикрича, ишончли икки томонлама хавфсизлик кафолатлари, айниқса АҚШ томонидан бериладиган кафолатлар, амалда аъзоликни ўрнини боса олиши мумкин.
Бундан ташқари, АҚШдаги сиёсий вазият, хусусан, президентлик сайловлари урушнинг кечишига таъсир кўрсатиши мумкин. Демократлардан номзод Камала Ҳаррис Украинанинг НАТОга кириши бўйича ўз позициясини аниқламади, Дональд Трамп эса урушни тезда тугатишга ваъда бермоқда, эҳтимол Киев фойдасига эмас.
Европа давлатлари ҳам молиявий қийинчиликларга дуч келмоқда, бу эса Украинага ёрдам кўрсатишни қийинлаштирмоқда. Бундан ташқари, Киев Глобал Жанубдан Россия билан тинчлик музокараларини фаоллаштириш талабига дуч келган.
Изоҳ (0)