AQSHning saylangan prezidenti Donald Tramp va Rossiya prezidenti Vladimir Putin telefon orqali muloqot qilgani haqidagi xabarlar haqiqatga to‘g‘ri kelmaydi. Bu haqda Kreml matbuot kotibi Dmitriy Peskov bayonot berdi.
“Hech qanday suhbat bo‘lmadi. Bu mutlaqo yolg‘on ma’lumot”, dedi Peskov jurnalistlarning tegishli savoliga javob berar ekan.
Avvalroq The Washington Post nashri manbalarga tayanib, Putin va Tramp 7-noyabr kuni telefon orqali gaplashgani haqida xabar bergan edi. Unga ko‘ra, amerikalik siyosatchi Floridadagi kurortidan shaxsan Rossiya prezidentiga qo‘ng‘iroq qilgan. Suhbat davomida Tramp “Ukrainadagi urushni yanada keskinlashtirmaslikni maslahat bergan” va unga “Vashingtonning Yevropada sezilarli armiyasi mavjudligi haqida eslatib o‘tgan”.
Tramp, shuningdek, urushning “tez orada hal etilishi”ni muhokama qilish uchun Putin bilan keyingi aloqalardan manfaatdorligini bildirgan.
“AQSHning yangi saylangan prezidenti ‘shaxsiy tarzda’ Rossiyaning ‘ayrim bosib olingan hududlar’ ustidan nazoratni saqlab qolishi variantini qo‘llab-quvvatlashi mumkinligini bildirgan va Putin bilan suhbatda bu masalaga to‘xtalib o‘tgan”, deb yozgan WP.
Suhbat rasmiy bo‘lmagan — Trampning o‘tish guruhi AQSH Davlat departamenti ko‘magida prezident qo‘ng‘iroqlarini o‘tkazishga imkon beradigan hujjatlarni hali imzolamagan. Bundan tashqari, Tramp o‘zining birinchi prezidentlik muddati davomidagi qo‘ng‘iroqlari stenogrammalarining oshkor etilganidan so‘ng davlat apparati amaldorlariga ishonchsizlik bilan qaramoqda.
Ukraina suhbatdan xabardor bo‘lganini rad etdi
Xuddi shu maqolada Trampning Putinga qo‘ng‘irog‘i haqida Ukraina hukumati xabardor qilingani ta’kidlangan. Ikki noma’lum manba Kiyevda bu suhbatga e’tiroz bildirilmaganini aytgan.
“Ukraina rasmiylari Tramp Putin bilan Ukraina uchun diplomatik yechim bo‘yicha hamkorlik qilishini allaqachon tushungan”, degan ular.
Ukraina Tashqi ishlar vazirligi bu ma’lumotlar haqiqatga to‘g‘ri kelmasligini ma’lum qilgan.
Ukraina tomoni taxmin qilinayotgan qo‘ng‘iroq haqida oldindan xabardor qilingani bo‘yicha xabarlar yolg‘on. Shunga ko‘ra, Ukraina qo‘ng‘iroqni ma’qullay olmas yoki qarshi chiqmas edi, dedi Ukraina idorasi rasmiy vakili Georgiy Tixiy.
Izoh (0)