Россия президентининг матбуот котиби Дмитрий Песков АҚШда ички сиёсий кураш воситаларидан бири сифатида фойдаланилаётган Россия президенти Владимир Путин номини тинч қўйишга чақирди.
“Путин фамилияси, таъбир жоиз бўлса, Қўшма Штатларнинг ички сиёсий курашидаги воситалардан бири сифатида қўлланади, бу бизга ҳақиқатан ҳам ёқмайди ва улар президент номини тинч қўйишларига умид қиламиз”, деди Песков журналистларга.
Песковнинг айтишича, Кремль мунозарани Москва вақти билан кечаси бўлиб ўтгани учун кузатиб бора олмаган.
“Аммо эрталаб, албатта, биз ушбу мунозаралар давомида айтилган турли баёнотлар билан янги хабарларни кўрдик”, дея қўшимча қилган у.
Жорий йилнинг 11 сентябрга ўтар кечаси Филаделфияда АҚШ президентлигига номзодлар – демократ Камала Ҳаррис ва республикачи Дональд Трамп ўртасида теледебат бўлиб ўтди. Баҳс АBC телеканали томонидан ташкил этилди. Сайлов 5 ноябрь куни бўлиб ўтиши кутилмоқда.
Дебат давомида Путин фамилияси 12 марта, хусусан, саккиз марта Трамп ва тўрт марта Ҳаррис томонидан тилга олинган. Бундан ташқари, Трамп ва Ҳаррис Россия ҳамда Украина ҳақида 11 марта гапирган.
Дебат чоғида бошқа масалалар қатори Украинадаги можаро ҳам муҳокама қилинган. Трамп ғалаба қозонса, у ердаги жанговар ҳаракатларни тўхтатишга яна бир бор ваъда берган.
Изоҳ (0)