Кремль Financial Times’нинг (FТ) Москва ва Киев энергия объектларига ўзаро ҳужумларни тўхтатиш бўйича музокаралар бошлагани ҳақидаги хабарини ёлғон деб атади.
“Ҳозир ҳақиқатга ҳеч қандай алоқаси бўлмаган жуда кўп хабарлар мавжуд. Ҳатто энг обрўли нашрлар ҳам бундай хабарлар чоп этилишига рухсат бермоқда”, дейди Россия президенти матбуот котиби Дмитрий Песков матбуот брифингида.
Аввалроқ FТ тегишли манбаларга таяниб, Украина ва Россия Қатар воситачилигида энергетика объектларига ҳужумларни ўзаро тўхтатиш бўйича дастлабки музокаралар олиб бораётганини хабар қилган эди. Унга кўра, Москва ва Киев ўзининг разведка хизматлари эришган келишувлар доирасида сўнгги ҳафталарда бир-бирининг энергетика инфратузилмасига ҳужумлар частотасини камайтирган.
“Мумкин бўлган музокаралар Украинанинг Курск вилоятига ҳужуми туфайли август ойида тўхтатилган саъй-ҳаракатларнинг қайта тикланишини англатади”, деб ёзган FТ.
Нашрнинг таъкидлашича, агар келишувга эришилса, бу 2022 йил февралидан бери можаронинг “энг катта деэскалацияси” бўлади.
Украина президенти Владимир Зеленскийнинг идораси мазкур хабарга изоҳ бермаган. Украина раҳбари октябрь ойи ўрталарида энергия иншоотларига зарба бермасликка чақирувчи келишув Россиянинг йирик тинчлик музокараларида иштирок этишга тайёрлигидан далолат беришини айтган эди.
Изоҳ (0)