Оқ уй Миллий хавфсизлик кенгаши матбуот котиби Жон Кирби брифингда Шимолий Корея қўшинлари Украинадаги можаро зонасида пайдо бўладиган бўлса, улар “қонуний ҳарбий нишонга” айланишини таъкидлади.
“Биз бу аскарлар Россия ҳарбийлари билан бирга жангга киришадими ёки йўқми, ҳозирча билмаймиз. Аммо бу, албатта, жуда хавотирли ҳолат. Агар улар Украинага қарши жанг қилишга киришадиган бўлса, улар қонуний нишонга айланади ва украиналик ҳарбийлар ҳам худди рус аскарларидан ўзини ҳимоя қилганидек, Шимолий Корея аскарларидан ўзини ҳимоя қилиши керак бўлади”, деди Кирби.
Россия ҳудудига КХДРдан ҳарбий хизматчиларнинг келиши ҳақидаги хабарлар ўтган ҳафта пайдо бўлган эди. Жанубий Корея разведкаси ҳисоб-китобларига кўра, Узоқ Шарқдаги Россия полигонларида Шимолий Кореянинг 1,5 минг аскари бор.
Америка томони маълумотларига кўра, октябрь ойида Владивостокка камида 3 минг шимолий кореялик ҳарбий келган ва улар бир неча ҳарбий полигонлар орасида тақсимланган. Жанубий Корея президенти Юн Сок Ёл буни провокация деб атади.
Кремль Шимолий Корея ҳарбийларининг Россияга юборилиши ҳақидаги хабарларни бир-бирига зид деб атади. Шимолий Корея эса бу хабарларни миш-миш сифатида баҳолади.
Изоҳ (0)