Трамп Украинадаги урушни 24 соатда тугатиш бўйича музокара олиб бориши мумкинлигини айтди. Кремл буни тасдиқлади

АҚШ собиқ президенти Дональд Трамп Truth ижтимоий тармоғидаги расмий саҳифасида агар у президент бўлса, Украинадаги урушни атиги бир кунда тугатиш бўйича музокара олиб бориши мумкинлигини айтди. Кремл расмийси эса буни тасдиқлади.

“Агар мен президент бўлганимда, Россия-Украина уруши ҳеч қачон юз бермаган бўларди, лекин ҳозир ҳам президент бўлганимда, 24 соат ичида бу даҳшатли урушни тугатиш бўйича музокарага эришардим”, — деди у.

Трампнинг баёнотига Россия президенти матбуот котиби Дмитрий Песков муносабат билдирди. У Трампнинг Украинадаги можарони бир кунда тугатиш имконияти ҳақидаги фикри ҳақиқатдан узоқ эмаслигини айтди. Песков Американинг ҳозирги президентида бундай имконият борлиги, лекин у Украинага қурол етказиб беришни танлаганини таъкидлади.

“Бунинг учун Вашингтондан Киев режимига тегишли кўрсатма бўлса бўлди, урушни тугатиш мумкин. Албатта, бир ёки икки кун ичида эмас. Аммо Киев режимининг калити асосан Вашингтон қўлида. Бироқ, ҳозирда Оқ уйнинг амалдаги раҳбари бу калитдан фойдаланишни истамаслигини кўрмоқдамиз”, — деди Песков.

Маълумот учун АҚШ Украинага Abrams танкларини етказиб беришга рози бўлди. Кремл Киевга танклар етказиб берадиган давлатлар урушга бевосита аралашаётганини таъкидлади.