АҚШ, Буюк Британия ва Франция Бирлашган Миллатлар Ташкилоти Хавфсизлик кенгашининг бугун, 19 октябрда ўтказиладиган ёпиқ мажлисида Эроннинг Россияга қурол етказиб бериши масаласини кўтармоқчи, деб хабар берди Reuters.
Украина Россияни БМТ Хавфсизлик Кенгашининг Эрондан қурол импорт қилишга эмбарго қўйиш резолюциясини бузганликда айбламоқда. Нашрга изоҳ берган дипломатларнинг таъкидлашича, ҳар учала давлат ҳам Эрон дронларининг олиб кирилиши БМТ Хавфсизлик кенгашининг 231-резолюциясини бузиш, деб ҳисоблайди. Ғарб давлатлари вакиллари БМТ вакилидан Хавфсизлик Кенгаши аъзоларини ушбу масала бўйича хабардор қилишни сўрамоқда.
Бундан ташқари, Украина БМТ экспертларини Россия ушбу резолюцияни бузган ҳолда Украинадаги нишонларга ҳужум қилиш учун фойдаланаётган Эрон дронларни келиб текширишга чақирди.
«Биз БМТ Хавфсизлик Кенгашининг 2231-резолюциясини амалга оширишга ҳисса қўшиш мақсадида қўлга олинган Эрон дронларини текшириш учун БМТ экспертларини имкон қадар тезроқ Украинага ташриф буюришга таклиф қилмоқчимиз», — дейилади Украинанинг БМТдаги доимий вакили мактубида.
14 октябрдаги мактубда айтилишича, Shahed ва Mohajer серияли дронлари август ойи охирида Россияга топширилган, бу эса Украина ва йирик Ғарб давлатлари 2015 йилда Эрон ядровий келишувини маъқуллаган 2231-резолюцияни бузиш ҳисобланади.
Резолюцияга кўра, Эронга қарши одатий қурол эмбаргоси 2020 йилнинг октябригача амал қилган. АҚШ собиқ президент Дональд Трамп даврида қурол эмбаргосини узайтириш ҳаракатларига қарамай, БМТ Хавфсизлик Кенгаши бу таклифни рад этиб, Эронга қурол экспортини қайта тиклашга рухсат берган.
Бироқ, Украина ва АҚШнинг таъкидлашича, резолюция ҳали ҳам ракеталар ва муайян технологияларга чекловларни ўз ичига олади, улар 2023 йил октябригача амал қилади ва Эрон учун учувчисиз учар аппарат каби илғор ҳарбий тизимларни экспорт қилиш ва сотиб олишни тақиқлайди.
Украина доимий вакилининг мактубида айтилишича, Mohajer ва Shahed дронлари 2231-резолюцияда назарда тутилган параметрларга жавоб беради, чунки уларнинг учиш масофаси 300 километрга тенг ёки ундан ошади.
Украинага камикадзе дронларининг ҳужуми
17 октябрь куни Россия Украина бўйлаб ўнлаб камикадзе дронларини учирди, бу эса энергетика инфратузилмасига зарар етказди, Киевда беш киши ҳалок бўлди.
Украина томонининг айтишича, Москва Эронда ишлаб чиқарилган Shahed-136 зарба берувчи дронларидан фойдаланмоқда. Ушбу дронлар нишонга қараб учади, сўнг пастлаб, зарба бериш пайтида портлайди.
18 октябрь куни расмий Киев Эрон Россияга қурол етказиб бераётгани сабабли Ислом республикаси билан муносабатларни узишга қарор қилди.
Теҳрон Москвага дронлар етказиб бераётганини рад этмоқда, Кремль эса бу ҳақда изоҳ бермаяпти. Вашингтоннинг фикрича, Эрон ҳақиқатдан ҳам Россияга қурол экспорт қилмоқда.
Эроннинг икки юқори мартабали расмийси ва икки дипломатининг Reuters агентлигига маълум қилишича, Эрон Россияга дронлардан ташқари «ер-ер» ракеталарини ҳам ваъда қилган.
Изоҳ (0)