АҚШнинг собиқ президенти Дональд Трамп Украинада содир бўлаётган ҳолатларни геноцид деб атади. Бу ҳақда у Fox News телеканалига берган интервьюсида маълум қилган.
Дастлабки телеканал бошловчиси Трампга АҚШда 41 йилдан бери биринчи марта кузатилган рекорд даражадаги инфляцияга изоҳ беришни таклиф қилган. Бунга жавобан собиқ президент Жо Байденнинг сиёсати шу каби юқори инфляция даражасини юзага келтирганини айтган. Трампнинг фикрича, у президент бўлган даврда «жаҳон тарихидаги энг юқори иқтисодиёт» яратилган, бироқ Байден лавозимга киришгач, «барчаси барбод бўлган».
«Буларнинг барчаси ўз-ўзига етказилган жароҳат эди, инфляциядан тортиб, энергия мустақиллигининг йўқотилишигача. Буни кузатиш жуда аянчли, энди бунга Украинада содир бўлаётган воқеаларни қўшинг. Украинада содир бўлаётган нарсалар — бу геноцид. Одамлар аввал ҳеч қачон бунақа нарсани кўрмаган», — дейди Трамп.
Аввалроқ АҚШ президенти Жо Байден россиялик ҳарбийларнинг Украинадаги ҳаракатларини геноцид деб атаган эди. Оқ уй расмий вакили Жен Псаки кейинроқ ушбу сўзлар Байденнинг шахсий фикри экани ва бу унинг Украинадаги вазият ҳақидаги қарашларини акс эттиришини маълум қилди. Шунингдек, у АҚШ президентининг баёноти тинчлик музокаралари истиқболига путур етказмаслиги ва мамлакатнинг вазиятни ҳал қилиш бўйича позициясига таъсир қилмаслигини қўшимча қилган.
Кремль Байденнинг сўзларини номақбул деб таърифлаган. «Биз мутлақо қўшилмаймиз, вазиятнинг бундай бузиб кўрсатилиши номақбул», — дейди Россия президентининг матбуот котиби Дмитрий Песков.
Изоҳ (0)