Россия 2025 йилги президентлик сайловларида Беларусдаги вазиятни беқарорлаштиришга уринишган тақдирда Минскка “ёрдам” кўрсатади. Бу ҳақда Россиянинг Минскдаги элчиси Борис Гризлов хабар берди.
Агар керак бўлса, Россия ўз мажбуриятлари доирасида, шубҳасиз, энг яқин иттифоқчимиз ва стратегик ҳамкоримиз сўрайдиган ёрдам ва қўллаб-қувватлов кўрсатади, деди Гризлов.
У Беларусь ҳуқуқни муҳофаза қилиш органлари ва махсус хизматларига “қуруқликда” ёрдам бериш талаб этилмаслиги, чунки улар “вазифаларини аъло даражада уддалашини” айтди.
Шунингдек, элчи Москва “реал вақт режимида” Минскка потенциал таҳдидлар ҳақидаги маълумотларни узатаётганини таъкидлади. У Беларусда президентлик сайловлари пайтида “провокациялар уюштирилиши” мумкинлигини истисно қилмади.
Беларусь давлати раҳбари ҳам, ҳуқуқ-тартибот идоралари раҳбарлари ҳам сайловлар арафасида бундай хатти-ҳаракатлар кузатилиши мумкинлиги ҳақида огоҳлантирилган. Бу фактнинг ўзи Беларусь ҳуқуқ-тартибот идоралари яқинлашиб келаётган провокациялардан яхши хабардор эканидан далолат беради. Хабардор экан, демак улар тайёр, дея хулоса қилди Гризлов.
Беларусда янги президентлик сайловлари 2025 йил 26 январга белгиланган. Марказий сайлов комиссияси сайлов кампанияси бошланганини эълон қилган. Беларусь раҳбари Александр Лукашенко президентлик сайловларида ўз номзодини кўрсатиш ниятида эканини маълум қилган.
Бораман, бораман, бораман. Мухолифатга етказинглар, бораман! Вазият қанчалик мураккаблашса, улар жамиятимизни қанчалик фаол безовта қилса, сизни, мени ва жамиятни қанчалик кўп таранглаштирса, мен бу сайловларга шунчалик тез бораман. Ташвишланманг, биз Беларусь учун нима зарур бўлса, шуни амалга оширамиз, деган Лукашенко “БелТА” агентлигига.
Кейинчалик у нутқини тузатган. “Кўп нарса ўзгариши мумкин. Табиий равишда, мен ва барчамиз, жамият содир бўладиган ўзгаришларга ва овоз бериш пайтига келиб қандай вазиятга дуч келишимизга қараб муносабат билдирамиз”, деган у.
Изоҳ (0)