Гулистон шаҳар тиббиёт бирлашмасига қарашли кўп тармоқли марказий поликлиника шифокорига махсус ойлик устама пули ундириб берилди. Бу ҳақда Олий суд ахборот хизмати хабар бермоқда.
Айтилишича, Гулистон шаҳар тиббиёт бирлашмасига қарашли кўп тармоқли марказий поликлиника шифокори томонидан “Иш берувчи янги иш бошлаган салоҳиятли ёш шифокорларга тўланиши лозим бўлган махсус ойлик устама пулини тўлаб бермаяпти” мазмунида йўлланган мурожаат Соғлиқни сақлаш ходимлари касаба уюшмаси Сирдарё вилояти кенгаши меҳнат ҳуқуқ инспектори томонидан ўрганиб чиқилган.
Мурожаатга мувофиқ шаҳар тиббиёт бирлашмасига кўрсатма хат киритилиб, амалдаги қонун-қоидаларга биноан ходим ҳисобига махсус ойлик устама пуллари тўланиши сўралган. Аммо кўрсатма хат ижроси рад қилингани сабабли ходим манфаатини ҳимоя қилиб фуқаролик ишлари бўйича Гулистон туманлараро судига даъво аризаси киритилган.
Мазкур даъво аризаси судда кўриб чиқилиб, ходим ҳисобига 11 миллион сўм миқдоридаги пул маблағи тўланиши ҳақида ҳал қилув қарори қабул қилинган. Натижада шаҳар тиббиёт бирлашмаси янги ходим учун тўланиши лозим бўлган устама пул маблағини суднинг ҳал қилув қароридан сўнг шифокорга тўлаб берган.
Изоҳ (0)