Швецияда ҳаёт, харажат ва даромад, фарзандлар келажаги ҳақида. Шаҳрисабзлик пицца тайёрловчи йигит ҳикояси (видео)

Блогер Бобур Умурзоқов “Дарё” сайти учун Швециядаги ҳаёт тарзи ҳақида туркум кўрсатувлар тайёрламоқда. Муаллиф ушбу давлатда ўқиш ва ишлаш учун борган ҳамюртларимиз билан суҳбатлашиб, қандай ҳужжатлар асосида хорижга келишгани, ойлик маошлар, шароитлар, камчилик ва афзалликлар нимада эканлиги ҳақида суҳбат қурди.

Кўрсатувнинг илк қаҳрамони — шаҳрисабзлик Фаррух Урунов. У 12 йилдан буён Швецияда оиласи билан яшайди.

— Ўн икки йил аввал Данияга бир ойлик туристик виза асосида келганман. 6-7 йил ноқонуний юриб, 2019 йилда илк визамни олганман. Ҳозирги кунда ноқонуний ишлаётган муҳожирлар учун қонунлар анча қаттиқлашган, аммо у пайтда вазият бир оз бошқача эди. Ҳужжатларим йўқлигида мени 3-4 марта кўчада полиция тўхтатган, аммо тушунтириш ишларини олиб бориб қўйиб юборган. Ҳозир эса дарров депорт қилади, яъни ҳужжати йўқ бўлса, у инсон бу ердан кетиши керак.

2020 йили Ўзбекистонда уйланиб, беш ойдан кейин аёлимни ҳам Швецияга олиб келдим. Икки фарзандим бор, уларнинг иккиси ҳам шу ерда дунёга келди. Ҳозир ўғил-қизим боғчага боришади, аёлим эса уй бекаси.

Ишга жойлашишда қандай қийинчиликка учрагани ва ойлик маоши ҳақида

— Бу ерга келганимда бор-йўғи 18 ёшда эдим. Ўзбекистонда электротехника сотадиган дўконда сотувчилик қилардим. Бу ерга келганимда қурилишга ишга жойлашдим. Деворларни бузишим керак эди, аммо ёш бўлганим учунми, у ишда ишлолмадим. Эртаси куни ишламайман десам, ишчи кучи кераклиги учунми, қурувчига ёрдамчи сифатида яна чақиришди. Бир ҳафта ишлаб, кейин бормайман дедим. Чунки Швециянинг об-ҳавоси ўзгача — қишда жуда совуқ бўлади. Ўша пайтда менга совуқда ишлаш ва эрта тонгда уйғониш ёқмаганди. Кейин пиццахонага ишга кирганман, аммо ҳужжатларим билан боғлиқ муаммо учун ишдан бўшатишган. Кейин мажбурликдан автомобиль ювиш шохобчасига ишга кирдим ва икки йил мобайнида ишладим. Кейин пиццахонага жойлашдим ва у асосий касбимга айланди. Бу ерда учта қашқадарёлик ўзбек ишлаймиз. Ҳафтада беш кун ишлайман ва 2200 АҚШ доллари маош оламан. Нолимайман, қишда иссиқ, ёзда салқин хонада тирикчилик қиляпман, дейди Фаррух Урунов.

Фарзандлар туғилиши ва туғуруқхона харажатлари ҳақида

— Фарзандларимизнинг хорижда туғилиши ҳеч қандай муаммо бўлгани йўқ. Аёлим иккимизнинг ҳужжатларимиз жойида бўлгани учун ҳали боламизнинг туғилиш вақти келмасидан бизга бириктирилган тиббиёт ходимлари қачон, қайси туғуруқхонага боришимизни белгилаб, навбат олиб қўйган. Аёлимнинг кўзи ёригач, 120 крон (тахминан 10 доллар) тўладим, холос. Аммо уйга қайтганимдан кейин 350 кронлик тўлов хабарномаси келди. Кейин билсам, бу тўлов аёлимга қараш учун бир кеча унинг ёнида қолганим учун экан. Аммо бундан бошқа ҳеч қандай тўлов қилганимиз йўқ.

Швецияда Ўзбекистон элчихонаси очилди ва болаларга Ўзбекистон фуқаролик паспортини олдик. Шу боис фарзандларимизнинг она юртга бориб-келишларида ҳам ҳеч қандай муаммо бўлгани йўқ.

Боғча харажатлари ва бола пули ҳақида

— Битта боланинг боғча харажати 650 крон, икковига тахминан 120 доллар атрофида тўлов қиламан. Бундан бошқа ҳеч қандай тўлов йўқ, ҳатто уларга ишлатиладиган тагликлар ҳам боғча ҳисобидан берилади. Бу ерда ҳар бир болага 1250 крондан бола пули берилади, иккита боламга 2500 крон нафақа оламиз. Пулни олиш учун ҳеч қандай ҳужжат топширилмайди, туғилганлик ҳақидаги маълумот қайд этилса, ўша бола номига 18 ёшига қадар пул ажратилади.

Кейин бу ерда онадан ташқари, болаларга қараш учун оталик таътили ҳам белгиланган. 10 кунлик таътил олдим ва ҳисобимга болаларимга қараганим учун 700 АҚШ доллари миқдорида пул ташлаб беришди, дейди Фаррух Урунов.

Швециянинг плюс ва минуслари ҳақида

— Беш йилга яқин навбатда туриб, шартнома асосида давлатдан икки хонали уй олганман. Уй ўз номимга чиққан ва шартнома асосида ойига 7500 крон тўлайман. Бундан ташқари, электр, интернет харажатлари билан ойига 1000 доллар уй учун сарфлайман. Рўзғор учун эса тахминан 600 доллар ажратаман. Айримлар озиқ-овқат қиммат дейишади, аммо мен бундай деб ҳисобламайман. Бу ердаги нарх-наво оладиган ойлик маошимизга яраша.

Тиббиёт хизматлари эса бепул, айниқса, болаларимнинг саломатлигига ҳамиша эътибор беришади. Фарзандларим доимо шифокор назоратида. Агар белгиланган вақтда мен уларни кўрикка олиб бормасам, жарима тўлайман.

Фарзандларининг европача тарбияси ва ватанга қайтиш ҳақида

— Рангим, миллатим бошқа. Ўн икки йилдан буён Швецияда ишлаётган бўлсам, бирорта шведдан “Сен келгиндисан” деган гапни эшитганим йўқ. Агар улар миллат ажратганида, бирортаси келиб қўлимдан пицца ейишмаган бўларди. Бу ерда одам ажратишмайди ва ҳамманинг ҳурматини жойига қўйишади. Давлат томонидан болаларимга яхши қарашаётгани учун улардан миннатдорман. Об-ҳавосининг бир оз ноқулайлигини айтмаса, бу ерда бошқа камчилик кўрганим йўқ. Фарзандларим бир оз катта бўлганидан кейин оилам билан, албатта, Ўзбекистонга кетаман. Чунки уларнинг европача тарбия олишидан қўрқаман.

Видеони тўлиқ ҳолда томоша қилинг.