Ўзбекистонда 1 майдан педагог ходимларнинг ойлик маошлари оширилгани маълум қилинди.
Хабарга кўра, 1 майдан мактабгача ва мактаб таълими, маданият ва спорт муассасалари педагог ва раҳбар ходимларининг базавий тариф ставкалари ҳамда туман (шаҳар) мактабгача ва мактаб таълими бўлимлари ходимларининг лавозим маошлари миқдорларини тасдиқлаш тўғрисидаги қарор кучга кирди.
2021 йил сентябрда Шавкат Мирзиёев фарғоналик сайловчилар билан учрашув чоғида ўқитувчилар маошини 1 000 долларга етказмагунча тўхтамаслигини маълум қилган эди. 2020 йилнинг ноябрида ўқитувчи ва шифокорлар билан учрашувда Президент уларнинг маошини ошириш бўйича катта режалар ҳақида эълон қилганди.
“Ўқитувчи 1 000 доллар олмаса, ишга келмаслиги керак. Худди шу ҳолат шифокор билан. Агар шифокор 1 000 доллар олмаса, эртага болалари ва невараларини қандай боқади?” — деган эди президент. Ўшанда Шавкат Мирзиёев кўпчилик мамлакатдаги тиббий хизматлар сифатидан норози эканини танқид қилганди.
Ўзбекистонда педагог ходим мақомини белгилашга оид қонун лойиҳаси ишлаб чиқилган эди. Мазкур қонун лойиҳаси манфаатдор вазирлик ва идоралар, таълим ташкилотларида фаолият юритиб келаётган педагог ходимларнинг таклиф ва истаклари, шунингдек, жамоатчилик муҳокамаси доирасида келиб тушган таклифлар асосида қайта ишланиб, Вазирлар Маҳкамасига киритилган. Қонун лойиҳасида педагог ходимларнинг ҳуқуқ ва мажбуриятлари, уларни ижтимоий ҳимоя қилиш ҳамда уларнинг ҳуқуқлари, шаъни, қадр-қиммати ва ишчанлик обрўси давлат ҳимояси остида бўлиши тўғрисидаги нормалар белгиланмоқда.
Шунингдек, профессионал таълим муассасаларида фаолият юритаётган ўқитувчилар маоши ўртача 20 фоизга оширилиб, юқори натижаларга эришганларга 50 фоизгача устама тўлаш тизими жорий этилиши кутилмоқда.
Изоҳ (0)