Тошкент вилоятида ит тишлаган 4 ёшли боланинг аҳволи ҳақида маълумот берилди

Тошкент вилоятининг Тошкент туманида 4 ёшли болага ит ташланганди. Ҳолат акс этган видео ижтимоий тармоқларда кенг тарқалди. “Миллий” телеканалининг “Миллар” дастурида боланинг аҳволи ҳақида маълумот берилди.

Дастурда маълум қилинишича, воқеа 16 октябрь куни соат 07:30 ларда содир бўлган. Аёл қизи ва ўғлини мактаб, боғчага олиб кетаётганида ит ташланиб қолган.

“Аёлим тез етиб келинг, 5-шифохонага кетяпмиз, болани кучук тишлаб ташлади, деган пайтда ҳиссиётимни сўзда ифодалаб бўлмайди”, дейди боланинг отаси.

У дайди итлар кўпайиб кетганини билдириб, уларни йўқотиш, хавфсизлантиришни сўрамоқда. Бола ҳозир шифохонада бўлиб, муолажалар олмоқда.

“Бола номаълум ит томонидан тишланган. Бўйин соҳаси, кўкрак қафаси соҳаси ва ўнг қўл тўртинчи бармоғини тишлаган, кўп жароҳатлар етказган. Қутуришга қарши вакциналар ва антибактериал дори муолажалари қилинди. Ветеринар кўриги бўйича ит назоратга олинган, 10 кун давомида кузатилиб, соғлиғи бўйича бизга маълумот беришади. Унгача бола бизнинг шифохонада ётиб, қутуришга қарши даво муолажаларини олади. Боланинг аҳволи ҳозир яхши”, дейди болани даволаётган шифокор.

Тошкент тумани ободонлаштириш бошқармаси ходимининг билдиришича, болани тишлаган ит 10 кун сақланади ва эгаси бўлмаса, питомникка топширилади.