Guliston shahar tibbiyot birlashmasiga qarashli ko‘p tarmoqli markaziy poliklinika shifokoriga maxsus oylik ustama puli undirib berildi. Bu haqda Oliy sud axborot xizmati xabar bermoqda.
Aytilishicha, Guliston shahar tibbiyot birlashmasiga qarashli ko‘p tarmoqli markaziy poliklinika shifokori tomonidan “Ish beruvchi yangi ish boshlagan salohiyatli yosh shifokorlarga to‘lanishi lozim bo‘lgan maxsus oylik ustama pulini to‘lab bermayapti” mazmunida yo‘llangan murojaat Sog‘liqni saqlash xodimlari kasaba uyushmasi Sirdaryo viloyati kengashi mehnat huquq inspektori tomonidan o‘rganib chiqilgan.
Murojaatga muvofiq shahar tibbiyot birlashmasiga ko‘rsatma xat kiritilib, amaldagi qonun-qoidalarga binoan xodim hisobiga maxsus oylik ustama pullari to‘lanishi so‘ralgan. Ammo ko‘rsatma xat ijrosi rad qilingani sababli xodim manfaatini himoya qilib fuqarolik ishlari bo‘yicha Guliston tumanlararo sudiga da’vo arizasi kiritilgan.
Mazkur da’vo arizasi sudda ko‘rib chiqilib, xodim hisobiga 11 million so‘m miqdoridagi pul mablag‘i to‘lanishi haqida hal qiluv qarori qabul qilingan. Natijada shahar tibbiyot birlashmasi yangi xodim uchun to‘lanishi lozim bo‘lgan ustama pul mablag‘ini sudning hal qiluv qaroridan so‘ng shifokorga to‘lab bergan.
Izoh (0)