Ўзбекистонда 2023/2024-ўқув йили давомида умумтаълим мактабларининг педагогларига 50 ва 20 фоиз устама тўлаб бериладиган сертификатлар рўйхати тасдиқланган эди. Айрим халқаро сертификатлар мазкур рўйхатдан олиб ташланди.
Мактабгача ва мактаб таълими вазирлиги ҳолат юзасидан баёнот берди. Унга кўра, ваколатли ташкилотлар томонидан рўйхатдан чиқарилган сертификатларни ўрганиш натижасида қуйидагилар аниқланган:
- сертификатларни беришда онлайн назорат тўғри йўлга қўйилмаганлиги, яъни бир шахс ўрнига бошқаси кириб топшириб чиқиш ҳолатлари мавжудлиги;
- баъзи сертификатларнинг ҳаққонийлигини аниқлаш имконияти мавжуд эмаслиги;
- сертификатларнинг ҳаққонийлигини текширилганда тест топширувчининг шахсини аниқлаш имконияти мавжуд эмаслиги;
- айрим сертификатларни бериш учун ўтказиладиган тест синовларида ахборот хавфсизлиги талабларига тўлиқ жавоб бермагани, тест саволларининг доимий такрорланиши.
Шундай бўлса-да, рўйхатдан чиқарилган сертификат эгаларининг 1 августга қадар олган сертификатлари учун сертификат якунига етиш муддатига қадар устама тўловлари тўлаб борилиши белгиланди. Шу билан бирга амалдаги норматив-ҳуқуқий ҳужжатларга мувофиқ APTIS For Teachers, Linguaskill сертификатларидан янги ишга қабул қилаётган талабгорларни ишга қабул қилиш жараёнларида фойдаланилиш имконияти сақланиб қолинмоқда.
2021 йил сентябрда Шавкат Мирзиёев фарғоналик сайловчилар билан учрашув чоғида ўқитувчилар маошини 1 000 долларга етказмагунча тўхтамаслигини маълум қилганди. 2020 йилнинг ноябрида ўқитувчи ва шифокорлар билан учрашувда президент уларнинг маошини ошириш бўйича катта режалар ҳақида эълон қилганди.
“Ўқитувчи 1 000 доллар олмаса, ишга келмаслиги керак. Худди шу ҳолат шифокор билан ҳам. Агар шифокор 1 000 доллар олмаса, эртага болалари ва невараларини қандай боқади?” — деган эди президент. Ўшанда Шавкат Мирзиёев кўпчилик мамлакатдаги тиббий хизматлар сифатидан норози эканини танқид қилганди.
Ўзбекистонда педагоглар сони
Статистика агентлиги маълумотларига кўра, 2022/2023-ўқув йилида республика бўйича умумтаълим муассасаларида таълим бераётган педагоглар сони (ўриндошларсиз) 521,6 минг нафарни ташкил этган. Шундан 159,9 минг нафарини ёки жами педагогларнинг 30,7 фоизини эркак педагоглар ташкил этган.
2022/2023-ўқув йилида 2018/2019-ўқув йилига нисбатан эркак педагоглар сони 27,8 минг нафарга ёки 21,0 фоизга кўпайган. Самарқанд ва Қашқадарё вилоятларида мактабларда таълим бераётган эркак педагоглар сони кўп.
Изоҳ (0)