2022 йилда Ўзбекистон соғлиқни сақлаш тизимига 28 триллион сўм маблағ ажратилди. Бу рақам ўтган йилга нисбатан 1,3 баравар кўп дегани.
Жорий йилнинг ўтган даврида республикада 106 та янги оилавий шифокор пункти ва поликлиникалар, 1 000 та маҳалла тиббиёт пункти ташкил этилди. Бу орқали бирламчи тиббий хизмати яна 3,5 миллион аҳолига етиб бормоқда.
Онколог шифокор Мақсуд Маллаев “Дарё”га берган интервьюсида соғлиқни сақлаш соҳасида юз берган бир қатор ўзгаришлар ҳақида гапирди.
“Жорий йилда давлат клиникаларига тенгма-тенг рақобат қила оладиган хусусий клиникалар сони кескин ошди. Бу тиббиётга берилаётган енгилликлардан далолат. 2000 йилларда битта хусусий клиникани очиш учун бюрократизм ва кўплаб қийинчиликлар бўларди. Ҳозирда хусусий клиника очишда муаммолар йўқ. Қолаверса, бу йўналишда давлат томонидан субсидиялар ҳам берилади.
2022 йил давомида шифокор пунктлари ва поликлиникалардаги тор мутахассислар сони ҳам сезиларли даражада оширилди. Маҳаллабай ишлаш тизими тиббиёт йўналишига ҳам кириб борди. Касалликларни тўлиқ рўйхатга олиш, беморларни тўғри йўналтириш тизимининг жорий этилишини йил янгилиги дейиш мумкин”, — деди шифокор.
[caption id="attachment_2292103" align="aligncenter" width="1920"]
Мақсуд Маллаев
Фото: “Дарё”
Жорий йилда Ўзбекистондаги 820 та бирламчи тиббиёт муассасаларига УЗИ ва ЭКГ ускуналари етказиб берилди. Оилавий шифокорлар томонидан бепул тарқатиладиган дорилар 45 турдан 70 турга кўпайди. Бунга ажратилаётган маблағлар ҳажми ҳам ўтган йилга нисбатан 3 баравар оширилди, яъни 188 миллиард сўмдан 540 миллиард сўмга етказилди.
Йил давомида оилавий поликлиникаларда 19 минг 500 та кундузги шифо ўринлари ташкил этилди. Бунинг натижасида 740 минг аҳолига шифохонага бормасдан, маҳалланинг ўзида даволаниш имконияти яратилди.
2022 йилда тиббиёт ходимларининг ойлиги 30 фоизгача оширилиб, шифокорларга иш самарадорлиги ва натижасига қараб табақалаштирилган рағбатлантириш ва устама тўловлари жорий этилди.
“Шифокорлар ойликларининг оширилиши, уларни моддий рағбатлантиришлар, тиббиёт ходимларига соғлиқни сақлаш фахрийси ва бошқа медаллар берилиши ҳам муҳим ўзгаришлардан ҳисобланади. Булар давлатга ҳар бир шифокор қанчалик муҳимлигини кўрсатиб берувчи эътибордир. Ҳамма ҳам ўзининг қилган ишини олий даражада баҳоланишини кўрса, яна икки баробар яхши ишлашга ҳаракат қилади”, — деди Мақсуд Маллаев.
Шифокорнинг қўшимча қилишича, йил давомида онкология соҳасида ҳам бир қатор ўзгаришлар амалга оширилган.
“2022 йилда онкология бўйича ҳар бир вилоятга нур терапия аппаратлари етказилди. Олдинлари бундай ускуналар республикадаги 2-3 та жойда бўларди. Бунинг оқибатида жуда узоқ навбатлар юзага келар, беморларнинг яримидан кўпи нур ололмасди. Ускуналар етишмаслиги сабабли тизимда коррупцияга йўл очиларди.
Ҳозирда ҳамма вилоятларга нур терапия ускуналари кириб борди. Бу онкологиядаги янги ютуқлардан бири.
Бундан ташқари, соҳамизда дори-дармонлар бошқа йўналишларга нисбатан анча қиммат. Шунга қарамасдан давлат томонидан аксарият беморларга дори-дармонларнинг кўп қисми қоплаб берилмоқда. Бу ҳам онкологиянинг битта ютуғи.
Ҳозирги кунда бизнинг онкологиямиз Европа ёки дунёнинг ҳар қандай давлати онкологияси билан бемалол тенглаша олади”, — деди шифокор.
Мақсуд Маллаевнинг айтишича, бугунги кунда чет элдан келган мутахассисларга Ўзбекистонда мастер-класс ва операциялар ўтказиш имконияти кенгайган.
“Эслайман, 2014-2016 йиллар оралиғида ҳамюртларимиз орқасида чет элга даволаниш учун кетиш авжига чиқди. Чунки хорижда тиббиёт сифати юқорилиги айтиларди. Ҳозир чет эл мутахассисларини ўзимизга олиб келиб, операция қилдириш амалиёти бошланган. Яъни хорижга 100 киши кетмаяпти-да, у ёқдан бир шифокор келиб, шу ернинг ўзида 100 нафар беморни операция қилмоқда. Бунда йўлкира ва чет элдаги клиникаларга сарфланадиган маблағлар ўзимизда қолмоқда. Бу тиббиётга кетаётган харажатларни 70-80 фоизга қисқартириб бермоқда. Қолаверса, ўзимизнинг шифокорлар ҳам хорижликлардан билим ўрганиб, уларнинг даражасига чиқмоқда. Бу 2022 йил ҳисобидан баралла гапириш керак бўлган яна бир катта ютуқ”, — деди Мақсуд Маллаев.
Президент Шавкат Мирзиёев 20 декабрь куни Олий Мажлисга қилган мурожаатида 2023 йилда республикада 140 та оилавий шифокор пункти ва поликлиникалар, 520 та олис ва чекка маҳаллада ихчам тиббиёт пунктлари ташкил этилишини маълум қилди.
Шу билан бирга, келаси йили оналар ва болалар саломатлигини муҳофаза қилиш бўйича уч йиллик катта дастур амалга оширилади. Барча туғруқ комплекслари тўлиқ таъмирланади ва жиҳозланади, ўринлар сони 35 фоизга кўпайтирилади.
Ҳозир мамлакатда 15 мингга яқин онкологик беморлар нур ёрдамида даволанишга муҳтож. Шу боис, келаси йилда Самарқанд, Фарғона ва Хоразмда хусусий шерикчилик асосида Радиология марказларини ташкил этиш лойиҳалари бошланади.
Исломбек Умаралиев суҳбатлашди
Изоҳ (0)